Skip to contentشێخێ ئاخر زەمان!
نووچە گەهانێ پیگەها دارکا مازی ل شەنگالێ راپۆرتەک پڕ زانیاری ل سەر وی کەسێ کو دژاتیا پێشمەرگەیان کری و کۆفری ل دژی خوەدایێ مەزن کری ژ بۆ مە شاندیە، ئەم دێ ب بشتبەستن ب راپۆرا نووچەگەهانێ خوە راستیان بەرچاڤ کین.
نووچەگەهانێ پیگەها دارکا مازی ئاشکەرا کر کو شەمۆ خدیدا عقدۆ حەسەن، کەسەکی درەوین و دز، سەختەچی و داخوازکری یە ژ لایێ دادگەهێ ڤە ب سووچا قاچاخچیتیێ و فێلکرن ل گەلێ شنگالێ، ئەڤ کەسە داکو خوە بپارێزیت جلکێن شێخان ل خوە کرینە و جارنا د مەدیایا پەکەکەێ دا وەکو زلامەک ئۆلی و شێخەک مەزن ل شەنگالێ دەردکەڤیت.
بەردەوام کر، ژبەرکو شەمۆ کەسەک داخوازکریە ژ لایێ دادگەهێ ڤە هەر دەما پێشمەرگە ڤەگەریت و یاسا بهێتە جێبەجێکرن کرن ئەو دێ هێتە دادگەهکرن و دارزاندن ژ بەر ڤێ یەکێ دژاتیا ڤەگەرینا پێشمەرگەیان دکەت، ئەو باش دزانیت پەکەکە هەم ناخوازیت و هەم ژی نەسیت وی دادگەهبکەت ژبەرکو هەر کەسەکی ل دژی پێشمەرگە و یاسایێ بیت پەکەکە وی دپارێزیت و وەکو کەسەکێ مەزن و گرینگ ددەتە ناساندن، ب تنێ داکو بشێت ل سەر ئەکرانێن تیڤی یێن خوە دیار بکەت و سلۆگان و ئاخافتنێن ب دلێ خوە ب وی بدەتە گۆتن.
نووچەگەهانێ مە هەر وەها راگەهاند، گەلێ شنگالی ب باشی شەمۆ ناس دکەن و باش دزانن سەنگ و عەقلێ شەمۆ چەندە، لێ ژ بەرکو پەکەکە وی دپارێزیت نەشێن ب رەنگەکێ ڤەکری ل سەر بئاخڤن و راستیا وی ئاشکەرا بکەن.
ش. ک. د کو یەک ژ خەلکێ شەنگالێ یە ژ نووچەگەهانێ مە را راگەهاند، شەمۆ ل سەر دەما رەژێما بەعس یا ژناڤچوویی یەک بوویە ژ باوەرپێکری یێن ئیستخباراتا سەدامێ دیکتاتۆر و پاش ئازادیا شنگالێ یەکەم جار ب کرێکاری یا ژ بۆ عەرەبان دەبارا ژیانا خوە دکر، پاشان وەکو بازرگان تەڤگەرییا یە و بازرگانی دگەل هندەک شێخێن عەرەبان ئەنجام دایە، ئەو شێخێن کو د دەما ئێریشا داعشێ دا ل پێشیا چەکدارێن داعشێ هاتی و مالێن ئێزدیان نیشانی وان دای و تالان کری.
ش. ک. د هەر وەها ئەشکەرە کر کو د دەما هاتنا داعشێ ژ بۆ شنگالێ شەمۆ ب رێیا شێخێن عەشیرەتا خاتۆنی بازرگانی دگەل داعشێ دکر و چەک و ترۆمبێل ژ بۆ رێخستنا تەرۆری یا داعشێ دکرین، ل سەر ڤێ یەکێ پاش ئازادکرنا شنگالێ ژ لایێ پێشمەرگەیان ڤە، شەمۆ چەندین جاران هاتیە دەستەسەرکرن.
یەک دی ژ خەلکێ شنگالێ ب ناڤێ ب. خ. ت ژ نووچەگهانێ دارکا مازی را راگەهاند، ل ناڤەراستا سالا ٢٠١٤ێ دا برایێ شەمۆ ب ناڤێ نائیف تەڤلی رێخستنا داعشێ بوویە و هەیا نها وەکە چەکدارەکی داعشێ ل سووریێ مایە.
ناڤبووری دیار کر، د دەما کارەساتا شنگالێ دا شەمۆ پەز و مالێ ئێزدیان ددزی، دەما فەرماندەیا شنگال هاتیە دامەزراندن ل سالا ٢٠١٥ێ دا ل سەر داخوازا “فەقیر جردۆ عقدۆ” کو دبیتە مامێ شەمۆ، و یەک ژ زەلامێن ئۆلی یێن ئێزدیانە و پارتیا دەمۆکرتا کوردستانێ وەکو هەموو زەلامێن ئۆلی یێن دی رێزێ لێ دگریت، دەلیڤە ژ پێ دهێتە دان کو وەکو پێشمەرگە بکەڤیتە ناڤا فەرماندەیا شەنگالێ دا لێ ب مەرجا کو دەست ژ کارێن خوە یێن قرێژ بەردەت، لێ بەلێ ل سالا ٢٠١٨ێ دا د ناڤا رەفێن پێشمەرگەیان دا هاتیە دەرخستن، ژبەرکو شەمۆ ب جلکێن پێشمەرگەیان قاچاخچیتی دکر و ل زالگەهان سەختەکاری دکرن و جلک و چەکێن هەڤالێن خوە ددزین، پشتی ناڤبووری د ناڤا رێزێن پێشمەرگەیان ل سەر چیایێ شنگالێ هاتیە دەرکرن چوویە د ناڤا پەکەکێ دا و دەمەکی بوویە ئاسایشا پەکەکێ ل شنگالێ، لێ بەلێ دیسان ژ بەر کارێن دوور ژ ئەخلاق و وەرگرتنا ریشوێ و کارێن قاچاخچیتیێ هاتیە دەرکرن.
نووچەگەهانێ پێگەها دارکا مازی ل دوماهیێ راگەهاند، شەمۆ نها وەکو کەسەک بێ بوها و دەڤ بەردایی ژ بۆ دروستکرنا فتنەیان و دروستکرنا فەوزایێ ل شنگالێ ژ لایێ پەکەکێ ڤە دهێتە بکارئانین، ژبەرکو ژیێ پەکەکێ و شەمۆ ل شنگالێ ب تەنێ ب فەوزایێ و دروستکرنا ئالۆزیان دێ پیچەکا دی ل شنگالێ درێژ بیت.
