كۆمێن میلیشیایێن حهشدا شهعبی ل بهغدا یا پایتهختا ئیراقێ، ئیرۆ ئێریشی سهر بارهگههێن پارتییا دهمۆكرات یا كوردستانێ كر و شهوتاند، وان بێرێزی ب ئالایا كوردستانێ كر.
ئیرۆ رۆژا شهمی 17/10/2020ان، كۆمێن میلیشیایێن حهشدا شهعبی ل ناڤهندا باژارێ بهغدا یا پایتهختا ئیراقێ، ئێریشی سهر بارگههێن گرێدای پارتییا دهمۆكرات یا كوردستانێ كر ژ وان بارهگهها لقا 5 یا پهدهكێ و شهوتاندن.
ههر چهند كو هێزێن ئهولههیێ د ئامادهبوون، لێ بهلێ وان تو كارڤهدانهك یان ههولهك ژ بۆ راگرتنا وان ئێریشان نهكر، كۆمێن میلیشیایان تهڤی كو بارهگههێن پهدهكێ شهوتاندن، ئالا كوردستانێ ژی ب چاڤساغییا هێزێن ئهولههیێ شهوتاندن و بێرێزی پێ كر.
ئهڤ نه جارا یهكهمینه كۆمێن میلیشیایێن گرێدای حهشدا شهعبی ئێریشی سهر پیرۆزیێن كوردستانێ دكن، د ئێریشا سهر بارهگهها لقا پهدهكێ ده، كۆمێن چهكداران ئالا حهشدێ ل جیێ ئالا كوردستانێ دانا.
ئێریشا سهر بارهگهها لقا پهدهكێ ههموهختا داخویانییهكه هشیار زێباری، ئهندامێ پۆلیتبیرۆیا پهدهكێ تێ كو ل حهسابا خوه یا تویتهرێ نڤیساندبوو: هنهك ژ كۆمێن میلیشیایان بوونه خهتهر ل سهر ئهولههییا ئیراقێ.
ل مهها رابووری، كۆمێن میلیشیایێن حهشدا شهعبی و ئالیگرێن وان چهندین جاران ئێریشی بالیۆزخانهیا ئهمهریكایێ ل بهغدایێ كربوو و گهف ل نوونهرێن ولاتان ل بهغدایێ خواربوون، ب ڤێ سهدهمی ئهمهریكایێ بریارا داخستنا بالیۆخانهیا خوه ل بهغدایێ دایه.