ئه‌نجوومه‌نا پارتییا ژیانا ئازاد یا كوردستانێ «پژاكێ» كوشتنا دوو گه‌ریلایێن خوه راگهاند كو ب ده‌ستێ سپایێ پاسداران هاتنه هه‌ده‌ف كرن.
ئه‌نجوومه‌نا پژاكێ د به‌یانه‌كه نڤیسكی دا كو دوهـ رۆژا شه‌می 17/10/2020ان به‌لاڤ كرییه ئه‌شكه‌ره كر، كو ل ناڤچه‌یا مه‌هابادێ یا رۆژهلاتا كوردستانێ، سپایێ پاسداران ئۆتۆمبێله‌كا گه‌ریلایێن وان هه‌ده‌ف كرییه، د ئه‌نجامێ ده، دوو گه‌ریلایان جانێ خوه ژ ده‌ست دایه و یه‌ك بریندار كه‌تییه.
ده‌ست نیشان كر، گه‌ریلایێن كو هاتنه كوشتن ب ناڤێ «هادی ئه‌مینی» ژ بۆكانێ یه و هه‌روها «سیروان مه‌حموودی» كو خه‌لكێ سنه‌یه، ل گه‌ل كه‌سه‌كێ دن ب ناڤێ «خدر بایه‌زیدی».
د داخویانییا پژاكێ ده هاتییه: هادی ئه‌مینی ئه‌ندامێ مه‌جلسا پژاكێ بوو و ئۆتۆمبێلا وان یا ژ جورێ جیپ ل 15 سێپتامبه‌رێ ل سه‌ر رێیا گوندێ «كۆنه‌دێ» یێ مه‌هابادێ كه‌تییه بیسه‌یه‌كا سپایێ پاسداران و ب گوللـه‌یه‌كا «ئار پی جی» یێ هاتبوونه هه‌ده‌ف كرن.
ل ڤێ ده‌ربارێ ده، رێخستنا هه‌نگاو یا مافێن مرۆڤان ئه‌شكه‌ره كر، سپایێ پاسداران جه‌سه‌دێ وان راده‌ستی مالباتێن وان نه‌كرنه.
