2 ھەزار و 500 پۆلیس ژ بۆ شنگالێ تێنە دامەزراندن

2 ھەزار و 500 پۆلیس ژ بۆ شنگالێ تێنە دامەزراندن

دو ھەزار و 500 پۆلیس ژ بۆ پاراستنا شنگالێ تێنە دامەزراندن کو ھەزار و پێنجسەد ژ وان، ژ کۆچبەرێن ناڤ کامپانن و ھەزار پۆلیس ژی ژ نشتەجیێن شنگالێ نە.

قایمقامێ شنگالێ دیار دکەت کو رۆژانە چەندین کەس ژ کۆچبەرێن شنگالێ داخوازا دامەزراندنێ دکەن و ئاشکەرا کر کو حەتا نھا زێدەتری 10 ھەزار کەسا داخوازا دامەزراندنێ د رێزا ھێزێن پۆلیسێن شنگالێ دا کرنە.

رێکەفتنا د ناڤبەرا حکوومەتا ھەرێما کوردستانێ و حکوومەتا فیدرالی یا ئیراقێ دا ژ بۆ ئاساییکرنا رەوشا شنگالێ، دکەڤیتە وارێ جیبەجیکرنێ. ئێک ژ خالێن رێکەفتنێ ئەوە کو 2500 کەس وەکو پۆلیسێن سەر ب حکوومەتا فیدرالی بهێنە دامەزراندن و 1500 ژ وان، د ناڤ کامپێن ئاوارەیان دا و 1000 کەس ژی ل شنگالێ بن.

قایمقامێ شنگالێ مەحما خەلیل ئاشکەرا کر کو رۆژانە پتری 10 ھەزار کەس ناڤێن خوە تۆمار دکەن و ئەوێن دێ هێنە دامەزراندن دڤێت خوەدان چەند شەرت و مەرجان بن کو ئێک ژ وان؛ تەمەنێ وان د ناڤبەرا 18 و 35 سالیێ دا بیت و هیچ پرسگرێکەکا وان یا یاسایی نەبیت.

د ناڤەندا شنگال و دەردۆرا وێ دا ھەژمارەک ژ ھێزێن جودا جودا ھەنە. ل گۆر رێکەفتنێ، دڤێت ھەموو ھێز ڤەکێشن و ئەوێن تێنە دامەزراندن لگەل پۆلیسێن دی جھێ وان بگرن و ژ بۆ پاراستنا ئەولەھیا شنگالێ ئەوێن کو دهێنە دامەزراندن، دڤێت ھەموو ژ خەلکێ شنگالێ بن.