ئەندامەکێ سەرکرداتیا پەدەکێ دبێژیت، پەکەکە بوویە سەبەبێ وێرانبوونا بەشەک ژ ھەرێما کوردستانێ و دخوازیت ھەژموونا داگیرکەران ل سەر کوردستانێ بسەپینیت.
ئەندامێ سەرکرداتیا پەدەکێ، عەلی عەونی ل سەر خرابکاریێن پەکەکێ ل ھەرێما کوردستانێ ژ بۆ تەلەڤیزیۆنا K24 داخویانی دا و گۆت، مخابن پەکەکە د ڤان شەرت و مەرجێن ھەستیار دا بوویە ھێزەکا مەترسیدار د دەستێ داگیرکەران دا. ل ھەر جھەکی کو داگیرکەر بخوازن زیانێ ل بزاڤا رزگاریخوازا کوردستانێ بدەن، پەکەکە رۆلەکا نگەتیف دگێریت. وەکو ھەسپێ ترۆدا لێ ھاتیە و دوژمنی رادکشیتە ناڤ کوردستانێ. رۆلا پەکەکێ ئەوە کو ت بزاڤەکا ناسیۆنالیستی یا کوردی نەگھیتە ئارمانجا خوە. ئەو ل دژی کوردستانێ کار دکەن و ھەڤکاریا دژمنێن کوردستانێ دکەن.
عەلی عەونی ھەر وھا گۆتیە، ھێز و چەتەیێن ترکان، ھەر جھەکی کو بخوازن داگیر بکەن، پەکەکە بەھانەیێ ددەتە وان و وان رادکشیتە ناڤ کووراھیا خاکا ھەرێما کوردستانێ. ل رۆژئاڤایێ کوردستانێ بوونە سەبەبا وێ یەکێ کو دنیا ب گومان ل ماف و ھەقخوازیا گەلێ کورد بنێریت. ل رۆژھەلاتێ کوردستانێ تەڤلی دەزگەھێن ئیستخباراتێ بوونە و ل دژی لایەنێن رەسەن خەبات دکەن. ل شەنگال و مەخموورێ بوونە بەشەک ژ حەشدا شەعبی و مووچەیێ خوە ژ حەشدا شەعبی وەردگرن. بوونە چەتە و ل ھەر دەری خرابکاری و ئالۆزیان چێدکەن. خەباتێ دکەن کو لایەنگری و دلسۆزیا گەلێ کوردستانێ بۆ حکوومەت و بزاڤا رزگاریخوازیا کوردستانێ لاواز بکەن. ئەو، بزاڤا کۆلەتی و نە رزگاریخوازیا کوردستانێ نە.
وی ئەندامێ سەرکرداتیا پەدەکێ ھەر وەھا راگەھاندیە، ئارمانجا پەکەکێ ئەوە ھەژموونا داگیرکەران ب سەر کوردستانێ بسەپینن. ئەو کارێن کو پەکەکە دکەت، بۆ ڤەشارتنا شکەستێن خوە ل باکوورێ کوردستانێ یە. ھەتا نھا نەشیایە بھوستەک خاکا کوردستانێ رزگار بکەن. د ھەموو واران دا شکەست خوارنە، ژ بەر وێ ژی دخوازن ب رەفتارێن دۆنکیشۆتانە خوە نیشان بدەن.
ب گۆتنا وی سەرکردەیێ پەدەکێ، جھێ خەباتا پەکەکێ نە باشوورە، بەلکوو باکوورێ کوردستانێ یە. ئەو بوونە بەلا ل سەر سەرێ خەلکێ، گوندیان و جۆتکارێن کوردستانێ. ئەو بوونە سەبەبا وێرانبوونا بەشەک ژ ھەرێما کوردستانێ و ناخوازن ھەرێما کوردستانێ پێش بکەڤیت.
عەلی عەونی د بەردەوامیا داخویانیا خوە دا گۆتیە، ھەبوونا پەکەکێ ل ھەرێما کوردستانێ نە رەوایە. یان دڤێت چەکێن خوە دانن و مینا کۆچبەران ل ڤێرە بژین یان ژی دڤێت ل ڤێرە نەمینن.
ل سەر داخویانیا پەکەکێ یا کو دبێژیت، وان رەوشا ھەرێما کوردستانێ ل بەر چاڤ گرتیە ژی، عەلی عەونی گۆت، کەنیا مرۆڤ ب وان ئاخافتنا دهێت!
