باله‌فرێن جه‌نگ په‌كه‌كه‌ ل شێلادزێ بۆمبه‌باران كر

باله‌فرێن جه‌نگ په‌كه‌كه‌ ل شێلادزێ بۆمبه‌باران كر

باله‌فرێن جه‌نگ یێن ده‌وله‌تا تركیێ، ئیرۆ لڤ و ته‌ڤگه‌رێن چه‌كدارێن په‌كه‌كێ ل سنۆرێ ناڤچه‌یا شێلادزێ یا باشوورێ كوردستانێ هه‌ده‌ف كر و 4 مووشه‌ك لێدانه‌.

چاڤكانیێن پێگه‌ها داركا مازی ل باشوورێ كوردستانێ، ئاگاهی ل ده‌ربارا ئێریشا تركیێ یا ئێڤارا ئیرۆ رۆژا ئینی 30\10\2020ان ب ده‌ست خستن كو باله‌فران لڤ و ته‌ڤگه‌رێن چه‌كدارێن په‌كه‌كێ ل سنۆرێ ناڤچه‌یا شێلادزێ هه‌ده‌ف كرنه‌.

ل گۆر ئاگاهیێن ده‌ستێ مه‌، باله‌فران ل ده‌مژمێر 4:20 ئێڤارا ئیرۆ، نوقته‌یێن په‌كه‌كێ ل ده‌ڤه‌را ب ناڤێ ئاسته‌نگا گوندێ سیدان ل ناڤچه‌یا شێلادزێ ل ده‌ڤه‌را نێروه‌ رێكان بۆمبه‌باران كرنه‌ و 4 مووشه‌ك لێدانه‌.

یه‌ك ژ جهێن كو كه‌تنه‌ به‌ر ئێریشا باله‌فران، نه‌خوه‌شخانه‌یا په‌كه‌كێ یا ده‌ڤه‌را زاپێ بوویه‌، لێ به‌لێ زرار نه‌هاتنه‌ زانین.

پارتییا كاركه‌رێن كوردستانێ هه‌ركو دچه‌ حه‌ره‌كه‌تا چه‌كدارێن خوه‌ تێخه‌ ناڤا گوند و نێزی باژارۆكان، په‌كه‌كه‌ ڤێ یه‌كێ ب ئه‌نقه‌ست دكه‌ ژ بۆ كو گوندێن باشوور ببن مه‌یدانا شه‌ر و ژ شێنییا وه‌رن ڤالا كرن، ب سه‌ده‌ما ڤێ ته‌كتیكا ب ئامانج یا په‌كه‌كێ، ژ خزیرانا ئیسالێ ڤه‌، ئارته‌شا تركیێ پێتری 30 نوقته‌یێن خوه‌ ل باشوورێ وه‌لات زێده‌ كرنه‌.