«هه‌ر وه‌ختا دلێ كوردستانێ ئازاد بوو، تربا من ببن وێ ده‌رێ»

«هه‌ر وه‌ختا دلێ كوردستانێ ئازاد بوو، تربا من ببن وێ ده‌رێ»

پارێزگه‌رێ كه‌ركووكێ و یێك ژ پشتگرێن هه‌ری دیار ئێن ره‌فه‌راندۆما سه‌رخوه‌بوونا كوردستانێ، ئیرۆ كۆچا داویێ كر، نه‌جمه‌ددین كه‌ریم د وه‌سیه‌تا خوه‌ ده‌ گۆت كو هه‌ر وه‌ختا كه‌ركووك ئازاد بوو، بلا تربا من ژ بۆ وێ ده‌رێ وه‌ره‌ ڤه‌گوهاستن.

ئۆفیسا راگهاندنێ یا نه‌جمه‌ددین كه‌ریم ئیرۆ رۆژا شه‌می 31/10/2020ان د به‌یانه‌كه‌ نڤیسكی ده‌ ئه‌شكه‌ره‌ كر، نه‌جمه‌ددین كه‌ریم یێ پارێزگه‌رێ كه‌ركووكێ ل یێك ژ نه‌خوه‌شخانه‌یێن ئه‌مه‌ریكایێ كۆچا داویێ كر.

راگهاندن وهایه‌:

ب خه‌مگینییه‌ك مه‌زن ڤه‌، ئه‌م رادگهینین كو پشتی نه‌خوه‌شكه‌تنا چه‌ند رۆژێن به‌رێ، برێز د. نه‌جمه‌ددین كه‌ریم پارێزگه‌رێ كه‌ركووكێ ل شه‌ڤا ئینی ل ده‌مژمێر 23:00ان ب ده‌ما ئامه‌ریكایێ ڤێ سبێ ل گۆر ده‌ما هه‌ولێرێ، كۆچا داویێ كر.

ئۆفیسێ ئه‌شكه‌ره‌ كر، ل سەر داخوازا د. نەجمەددین کەریم رەحما خودێ لێ بە، جەنازەیێ جەنابێ وی بۆ کوردستانێ دێ وەرە ئانین و ب ئاوایەکی دەمکی ل کوردستانێ وەرە بخاکسپارتن، ھەتا وێ دەما کو باژارێ کەرکووکێ وەرە ئازادکرن و د بن ئەولەھی و ئارامی و ھێزێن پێشمەرگە دە بە، ب ئاوایەکی ماییندە دێ بۆ باژارێ کەرکووکا پیرۆز وەرە ڤەگوھەستن.

ل گۆر وەسیەتا د. نەجمەدین کەریم تازی دێ نەیێ دانین، داکو قەرەبالخی چێنەبە و ژ بەر بەلاڤبوونا ڤیرۆسا کۆرۆنایێ، رەوشا تەندروستیا گشتی وەرە پاراستن.

نه‌جمه‌ددین كه‌ریم ب یێك ژ خه‌باتكار و وه‌لاتپارێزێن باشوورێ كوردستانێ دهات حه‌ساب كرن، پشتگرییه‌كه‌ بێ هه‌مپا ل دۆزێن هلدانا ئالا پیرۆزا كوردستانێ ل كه‌ركووكێ و هه‌موه‌خت ره‌فه‌راندۆما سه‌رخوه‌بوونا كوردستانێ یا 2017ان ل كرییه‌، هه‌ر ب ڤێ سه‌ده‌مێ هێزێن داگیركه‌رێن كه‌ركووكێ و ل پێشییا وان سه‌رۆكوه‌زیرێ به‌رێ یێ ئیراقێ حه‌یده‌ر عه‌بادی، بریاره‌كه‌ ده‌رقانوونێ د راستا نه‌جمه‌ددین كه‌ریم ده‌ ده‌رخست و خوه‌ست ب رێیا گرۆپا خائینان ژ بۆ به‌غدایێ وه‌ره‌ راده‌ست كرن، لێ به‌لێ ئه‌ڤ ئامانجا وان سه‌رنه‌گرت.