عەلی عەونی ئەندامێ سەرکرداتییا پارتیا دیمۆکراتا کوردستانێ راگەهاند د نها دا پەکەکە وەکو کۆمپانیەکا سیکیۆرتی سەرەدەریێ دکەت، تو دکاری هندەک پارەیان ب پەکەکێ بدەی و چەند چەکداران ژ وان کرێ بکەی و ب ڤی رەنگی ب وان چەکداران گەفان ل ڤی کەسی و کەسێ هە بکەی.
پشتی کو د دەما رابووری دا چەندین جاران پەکەکێ گەف ل بەرژەوەندیێن هەرێما کوردستانێ و شەرکرن ل دژی پێشمەرگەیێن کوردستانێ کر و هەر وەها چەندین جاران بۆریا نەفتا هەرێما کوردستانێ د ناڤا ئاخا باکورێ کوردستانێ دا تەقاندی، عەلی عەونی راگەهاند کو پەکەکە بوویە کۆمپانیەکا سیکیۆرتی.
عەلی عەونی کو ب کەسەک توندرەو د وارێ پرسێن نەتەوی دا دهێتە ناسکرن و د نها دا وەکو بەرپرسێ لقا 8 یا پارتیا دیمۆکراتا کوردستانێ ل زاخۆیێ کار دکەت گۆت، پەکەکە رۆلا کۆمپانیێن سیکیۆرتی دگێریت، کێ پێویستی پێ هەبیت دکاریت ب پارە هندەک چەکداران لێ وەرگریت و پاشان ب وان چەکداران گەفان ل خەلکێ بکەت.
هەر وەها عەلی عەونی راگەهاند گەر پەکەکە راست دبێژیت کو هەولێر، شنگال، کەرکووک و ئیسپانیا و ئەرمەنیستان رزگار کرینە بۆچی حەتا نها نەکاریە ب تەنێ گوندێ عەڤدلا ئۆجەلان رزگار بکەن؟ گەلۆ کی رێگرە ل همبەر ئازادکرنا گوندێ ئۆجالان ژ لایێ پەکەکێ ڤە؟ بۆچی پشتی 42 سالان ژ خەباتا چەکداری حەتا نها پەکەکە نەکاریە 42 مەتران ل باکورێ کوردستانێ رزگار بکەت؟ کیژان ناڤچە یان باژار یان گوند هەیە کو پەکەکێ ب شەر ل دەستێن ترکیێ یان دەلوتەکا دی یا داگیرکار رزگار کربیت؟ دبیت هەموو گەلێ کورد ب تایبەتی لایەنگرێن پەکەکێ ل دووڤ بەرسڤا ڤان پرسان و ب سەدان پرسێن دی یێن ب ڤی رەنگی بگەرن، پێویستە رێڤەبەرێن پەکەکێ ئێدی دەست ژ سلۆگان و ئاخافتنێن مەزن و مەشێن بێ رامان بەردن، پێویستە پەکەکە حەدێ خوە بزانیت.
