پەکەکێ دەست ب ئامادەکاریێن شەری ل دژی باشوورێ کوردستانێ کرن

پەکەکێ دەست ب ئامادەکاریێن شەری ل دژی باشوورێ کوردستانێ کرن

پارتیا کارکەرێن کوردستانێ ب رەنگەکێ سیستەماتیک و پێشوەخت خوە ژ بۆ شەرێ ل دژی حکوومەتا هەرێما کوردستانێ ئامادە دکەت و د ڤێ دەربارێ دا ل ناڤخوەیێ کوردستانێ و ئەورۆپایێ دەست ب کۆمکرنا پارەیان ژ بۆ کرینا چەک و جەبلخانەیان ژ بۆ شەرێ ل دژی حکوومەتا هەرێما کوردستانێ کریە.

پشتی تێکچوونا رەوشا باشوورێ کوردستانێ ب سەدەما لڤین و تەڤگەرێن بەردەوام یێن پەکەکێ و بۆمبەبارناکرنا باشوورێ کوردستانێ ب سەدەما پەکەکێ ژ لایێ بالەفرێن دەولەتا ترکیێ ڤە و کوشتنا فەرمانبەرێن هەرێمێ و داخویانیێن ئاگرین یێن دژە کوردێن پەکەکێ ل دژی هەرێما باشوور و حکوومەتا وێ یا مەشرووع نها پەکەکێ ب رەنگەکێ پراکتیک دەست ب خوە ئامادەکرنێ ژ بۆ شەری کریە و دخوازیت شەرێ میدیایی ل دژی هەرێما کوردستانێ دەرباسی شەرێ چەکداری بکەت و جارەکا دی رەوشا باشوورێ کوردستانێ مینا سالێن 90ان ژ چەرخێ رابووری بکەت و گەنجێن کورد ب کوشتن بدەت.

د ڤێ دەربارێ دا چاڤکانیێن پێگەها دارکا مازی ل ئەورۆپایێ دەستنیشان کر، کادرێن پەکەکێ یێن ل ئەورۆپایێ مژوولی کۆمکرنا پارەیانە ژ گەلێ کورد یێن ل ئەورۆپایێ دمینن، ژ بۆ کو وان پارەیان ژ بۆ کرینا چەک و جەبلخانەیان بشینن قەندیلێ، چاڤکانیێن پەگەها مە هەروەها ئاشکەرا کر کەسێن کو رازی نابن پارەیان بدەن کادرێن پەکەکێ راستی ئێریشێ دهێن و کادرێن پەکەکێ گەفان ل وان دکەن و وان ب سیخور و کرێگرتێێن میتێ ددەنە ناساندن.

وسا دیار دبیت کو گرووپا ئەنقەرەیێ بریار دایە جارەکا دی رەوشا باشوورێ کوردستانێ ب بەهانەیێن بێ رامان وەکو رەوشا سالێن 90ان ژ سەدسالا رابووری بکەن و دخوازن خواستەکا دەولەتا ترکیێ و ئیرانێ ژ بۆ ژناڤبرنا ستاتۆیا هەرێما کوردستانێ و پاشڤەبرنا وێ ب ئاوایەک پراکتیک جێبەجێ بکەن.