سەرۆکێ جوانێن نەتەوی یێن کوردستانێ: ئێریشا پەکەکێ جھێ شەرمەزاریێ یە

سەرۆکێ CNK: ئێریشا پەکەکێ جھێ شەرمەزاریێ یە

سەرۆکێ جوانێن نەتەوی یێن کوردستانێ (CNK) ژیان تمورتاش ل سەر کریارێن پارتیا کارکەرێن کوردستانێ (پەکەکێ)یێن ل ھەرێما کوردستانێ دیار کر کو “دڤێت پەکەکە رێزێ ل حکوومەتا ھەرێما کوردستانێ بگریت. حکوومەتا ھەرێما کوردستانێ مەشرووعە و نە جھێ نیقاشێیە”.

ژیان تمورتاش ژ باژارێ دیاربەکرێ یێ باکورێ کوردستانێ بەشداری بولتەنا نووچەیانا کوردستان٢٤ێ بوو و ل سەر دەستێوەردانێن پککێ یێن ل ھەرێما کوردستانێ دیار کر: “پەکەکە دەمەکێ درێژە ل دژی داگرکەران شەری ناکەت، لێ وسا دیار دکەت چالاکیێن دوماهیێ یێن ل ھەرێما کوردستانێ و تەقاندنا بۆریا نەفتێ و ئیرۆ ژی مخابن پێشمەرگەیەک شەھید کر و ب ڤان کریارێن خوە دبێژیت ئەز نکارم ل دژی داگیرکەران شەری بکم، لێ ئەز د شەرێ کوردان دا ژێھاتی مە. ئەڤ جھێ شەرمەزاریێ یە.”

تمورتاش دەستنیشان کر: “مەدیایا پەکەکێ دەمەکێ درێژە بانگەشەیا براکوژیێ دکەت. د ڤێ دەربارێ دا ژی وەکو سەرۆک بارزانی گۆتی؛ نابیت ھەلویستا حەرامکرنا شەرێ کورد و کورد ب وێ یەکێ بهێتە شیرۆڤەکرن کو ئارامی و ئاساییشا باژار و باژارۆک و گوندێن ھەرێما کوردستانێ بێنە تێکدان و وەلاتی بێنە نەچارکرن کو مال و وارێن خوە ب جھ بھێلن و ببنە قوربانی و هیچ کەسەک دەنگی نەکەت.”

ژیان تمورتاش گۆت: “ئەڤ چالاکیێن دەمێن داوی و رێزنەگرتنا ل ھەرێما کوردستانێ، سەدەما ھەبوونا پەکەکێ ژ ھۆلێ رادکەت. دڤێت رێز ل حکوومەتا ھەرێما کوردستانێ بگریت. حکوومەتا ھەرێما کوردستانێ یا مەشرووعە و نە جھێ نیقاشێیە. دەستکەفتێن ئیرۆ ل ھەرێما کوردستانێ ھەنە، ئەنجاما فەداکاری و قەھرەمانیا ب سالانا کوردانە.”

ئیرۆ ل سینۆرێ ناحیا چەمانکێیا سەر ب قەزایا ئامێدیێ ڤە، چەکدارێن پەکەکێ ئێریشی سەر ھێزەکا پێشمەرگەیێن کوردستانێ کربوو و د ئەنجاما وێ ئێریشێ دا پێشمەرگەیەک شەھید بوو.

ھەروھا ڤێ ئێڤارێ چەکدارێن پارتیا کارکەرێن کوردستانێ (پەکەکێ) ل دەڤەرا چەمانکێ ئێریش کرنە سەر ھێزەکا پۆلیسێن پەترۆل و گازێ کو ل وێ دەڤەرێ ئەرکێ خوە جێبەجێ دکرن، د ئەنجاما ئێریشێ دا دو پۆلیس بریندار بوون.

چەند رۆژ بەرێ ژی چەکدارێن پەکەکێ بۆریا پەترۆلێیا ھەرێما کوردستانێیا ل سینۆرێ ترکیێ تەقاندبوون و رایەدارێن ھەرێما کوردستانێ ئاشکەرا کرن کو ژ بەر تەقاندنا بۆریا پەترۆلێ، رۆژانە ١٠ ملیۆن دۆلار زرار دگھیتە ھەرێما کوردستانێ.