تێ پێشبینی كرن سبه رۆژا ئینی 6/11/2020ێ، ته‌رمێ د. نه‌جمه‌ددین كه‌ریم پارێزگه‌رێ كۆچ كری یێ كه‌ركووكێ، بگه‌هیته هه‌رێما باشوورێ كوردستانێ.
ل گۆر ئاگاهیێن كو مالباتا د. نه‌جمه‌ددین كه‌ریم پارڤه‌كرنه، سبه رۆژا ئینی ته‌رمێ د. نه‌جمه‌ددین كه‌ریم ژ ئه‌مه‌ریكایێ دێ بگه‌هیته هه‌رێما باشوورێ كوردستانێ و ل باژارێ هه‌ولێرێ دێ ب ئاوایه‌كی ده‌مكی بهێته ب خاك سپارتن.
د. نه‌جمه‌ددین كه‌ریم ل 31 مه‌ها رابووری ب سه‌ده‌ما نه‌خوه‌شیێ كۆچا داویێ كر، ل سه‌ر وه‌سیه‌تا وی دێ ب ئاوایەکێ دەمکی ل کوردستانێ ب ئاخێ هێت سپارتن، ھەتا دەما کو باژارێ کەرکووکێ تێ ئازادکرن و د ژێر ئەولەھی و ئارامیا ھێزێن پێشمەرگە دە بە، دێ وێ دەمێ ب ئاوایەکێ ھەرتمی بۆ باژارێ کەرکووکێ بێ ڤەگوھاستن.
در. نەجمەدین کەریم سالا 1949 ل کەرکووکێ ژ دایک بوو و ھەتا خوەندنا ئامادەیی ل وی باژاری بوو و پاشێ چوو مووسلێ و بەشا پزیشکێ ل کۆلیژا پزیشکی یا مووسلێ خوەند، ل سالا 1972ێ بوو پێشمەرگە، ژ سالا 2011 تا 2017ێ پارێزگارێ کەرکووکێ بوو.
نه‌جمه‌ددین كه‌ریم ب یێك ژ خه‌باتكار و وه‌لاتپارێزێن باشوورێ كوردستانێ دهات حه‌ساب كرن، پشتگرییه‌كا بێ هه‌مپا ل دۆزێن هلدانا ئالا پیرۆزا كوردستانێ ل كه‌ركووكێ و هه‌موه‌خت ره‌فه‌راندۆما سه‌رخوه‌بوونا كوردستانێ یا 2017ێ كر، هه‌ر ب ڤێ سه‌ده‌مێ هێزێن داگیركه‌رێن كه‌ركووكێ و ل پێشییا وان سه‌رۆكوه‌زیرێ به‌رێ یێ ئیراقێ حه‌یده‌ر عه‌بادی، بریاره‌كه ده‌رقانوونێ د راستا نه‌جمه‌ددین كه‌ریم دا ده‌رخست و خوه‌ست ب رێیا گرۆپا خائینان ژ بۆ به‌غدایێ وه‌ره راده‌ست كرن، لێ به‌لێ ئه‌ڤ ئامانجا وان سه‌رنه‌گرتبوو.
