هەڤدەم دگەل بەردەوامبوونا دژایەتیا پەکەکێ ژ بۆ باشوورێ کوردستانێ و سازیێن فەرمی یێن ڤێ پارچەیا کوردستانێ و گەف کرنێن بەردەوام یێن بەرپرسێن ڤێ پارتیێ و ئێریشێن وان یێن ڤێ داوییێ ل سەر پێشمەرگەیێن کوردستانێ ل هەر دو ناڤچەیێن دینارتێ و چەمانکێ و شەهید کرنا پێشمەرگەیەکێ و بریندارکرنا چەندین پێشمەرگەیێن دی، پەکەکێ دەست ب شەرەکی ئایدۆلۆژی و میدیایی ژی کریە ل دژی باشوورێ کوردستانێ.
پشتی تەڤلیهەڤبوونا رەوشا باشوورێ کوردستانێ ب سەدەما کریزێن سیاسی و ئابووری و ئێریشێن دەولەتا ترکیێ بۆ سەر پێگەهێن پەکەکێ ل باشوورێ کوردستانێ و تەسلیمکرنا حەفتەنینێ و مەتینا و جیهێن دی یێن سنۆری کو پێش نها د دەستێن پەکەکێ دا بوون، نها پەکەکە داکو رۆلا خوە وەکو پرا دەرباسبوونا ترکیێ ژ بۆ باشوورێ کوردستانێ بجیهـ بینە، خوە نێزیکی باژار و باژارۆکێن باشوور کریە و دخوازیت ل نێزی باژێران بجیهـ ببیت داکو ترکیێ ژ بۆ وان ناڤچەیان راکێشیت و وان ناڤچەیان ژی تەسلیمی ترکیێ بکەت. بۆ ڤێ یەکێ داکو شەرعیەتێ بدەتە کارێ خوە بەردەوام گەفان ل حکوومەتا هەرێما کوردستانێ دکەت و ئێریشی پێشمەرگەیان دکەت، هەرچەند پەکەکێ هێزا خوە یا جاران نەمایە، گەر نا ئەڤ دەمەک بوو دەست ب ئێریشەکە مەزن کربوو لێ بەلێ د نها دا ژی ئێریشان دکەت داکو بێژیت بەلێ ئەز مایمە، ئەز ل ڤێرەمە.
پەکەکێ هەموو چاپەمەنیا خوە خستیە کار و دخوازیت گەلێ کورد چەواشە بکەت و ئێریشا ل سەر حکوومەت و پەرلەمانێ کوردستانێ ب ئێریشا ل سەر پەدەکێ و خوە پاراستنا رەوا بدەتە نیشاندان، پەکەکێ ژ بۆ ڤێ یەکێ نە ب تەنێ چاپەمەنیا خوە بەلکو چاپەمەنییا ئێکەتیێ ژێ کو نها د دەستێن لاهۆرێ شێخ جەنگی دا هاتیە مۆنۆپۆلکرن ژی ب کار خستیە داکو دەرەوان سەرڤیس بکەن و رەواتییێ بدەتە کارێ خوە و وەسا نیشان بدەت ئەڤە پارتی یە شەری ب پەکەکێ دفرۆشیت، پەکەکە ب هاریکارییا ئێکەتیێ ب تایبەت تاقما لاهۆر جەنگی د سۆسیال میدیایێ دا ب سەدان رۆپەل و حەسابێن شەخسی ژ بۆ بەرەڤاژیکرنا بوویەران و تاوانبارکرنا پارتی و نیشاندانا ڤی شەرێ کو پەکەکە ب باشوور دفرۆشیت وەکو شەرێ پارتی و پەکەکێ بدەتە نیشاندان. د ڤێ دەربارێ دا دوهـی پشتی ئێریشا پەکەکێ ل سەر پێشمەرگەیان، پەکەکێ و ئێکەتیێ هەموو هەول دان کو ڤێ بوویەرێ وەکو ئێریشکرن ل سەر پەکەکێ ژ بال پارتی ڤە بدتە نیشاندان، وان ب سەدان نووچەیێن ساختە ب ناڤێ بەرپرسێن پێشمەرگە و کەسێن دیار وەکە محەمەد پێنجوینی سەرڤیسکرن و ئەڤ دەرە وەکو راستی ب گەلێ کورد دان نیشاندان.
پەکەکە نها د مەدیایا خوە دا ب تایبەتی سۆسیال مەدیایێ دا وها ددەتە نیشاندان کو ئەڤە پێشمەرگە یە ئێریشی وان دکەت، و ئەو ب تەنێ خوە دپارێزن، ئەڤ یەک ب ئاشکەرا د داخوەیانییا دوماهیێ یا هەپەگێ دا ژی دیار بوو، پشتی ئێریشا چەمانکێ هەپەگێ داخوەیانیەک بەلاڤکر و تێدا راگەهاند، “پێشمەرگەیێن پەدەکێ دخواست دەرباسی هەرێمێن گەریلایان ببن”، ب ڤێ گۆتنێ باش دیار دبیت کو هەپەگە ژ بەر لاوازییا خوە وەکو پیرەکالەکی کو هشێن خوە ژ دەست دابن دئاخڤیت، گەرنا تو هەرێمەک ب ناڤێ هەرێمێن گەریلا نینە، د بەشەکە دن ئا داخوەیانیا خوە دا هەپەگێ راگهاندبوو: “مە هشیاری دا وان کو دەرباسی هەرێمێن گەریلان نەبن، گەر نا ئەم بێ دەنگ نامینین، پێشمەرگەیان گوهداری نەکر و مە ژی دو مایینێن چاندی تەقاندن، داکو رێگریێ ل پێشمەرگەیان بکین”، ل ڤێرە فەرە ژ پەکەکێ بپرسین گەلۆ هەرێمێن گەریلا کووڤە نە؟! قای چەمانکێ و دینارتێ هەرێمێن گەریلانە؟ هوون ب چ ماف دکارن رێگریێ ل پێشمەرگەیێن کوردستانێ بکن، و رێگریێ ل پێشمەرگەیان بکن کو ل وێ هەرێما خوین ژ بۆ رشتی و هەیا نها خوینا شەهیدان ل وان ناڤچەیان دحەرکیت ب هەرێمێن خوە بزانن؟ هەرێمێن گەریلا ل باکورن نەک ل باشوور، هەرن و ل باکور رێگریێ ل لەشکەرێن ترکیێ بکن کو نەکەڤن هەرێمێن وە، ل باشوور حکوومەت، پەرلەمان و پێشمەرگە هەنە هیچ پێویستیا وان ب وە نینە.
لێ بەلێ سەرڤیسکرنا دەرەوان ژ بال پەکەکێ و لاهۆرێ شێخ جەنگی ڤە د سۆسیال مەدیایێ دا نەکاری کارێ تەرۆریستی یێ پەکەکێ ل بەر چاڤێن گەل بەرزە بکەت، گەلێ باشوور ئەڤ کارێ تەرۆریستی و شەهید و بریندارکرنا پێشمەرگەیان ب توندترین ئاوا پرۆتەستۆ کر، گەلێ باشوور ژ پەکەکێ خواست خەباتا خوە ل باکور و ل دژی ترکیێ بکەن ، وان گۆتە پەکەکێ هوون ب سەرڤیسکرنا دەرەوان و هێنجەتێن بێ رامان نکارن رەواتیێ ب کارێ خوە یێ تەرۆریستی و دوور ژ کوردایەتیێ بدەن، گەر هوون بخوازن خەباتێ بکن هەرن ل باکورێ کوردستانێ هەرێمێن گەریلایا بپارێزن، ئۆجەلان نە ل ئامێدیێ یە ئەو ل ئیمرالیێ یە و ئێریشی ور بکن.
