هه‌ژماره‌كه شه‌رڤانێن هێزێن سووریایا ده‌مۆكراتیك، نامه‌یه‌ك ژ بۆ فه‌رماندارێ خوه مه‌زلووم عه‌بدی شاندییه و تێده داخواز كرنه مه‌زلووم عه‌بدی به‌رسڤه‌كا زه‌لال ل ده‌ربارا هێرشێن ڤێ داویێ یێن په‌كه‌كێ ل باشوورێ كوردستانێ بده‌ت.
ل گۆر ئاگاهیێن ده‌ستێ مه، هه‌ژماره‌كه شه‌رڤانێن هێزێن سووریایا ده‌مۆكراتیك هه‌سه‌دێ، ل رۆژا 5/11/2020ان، نامه‌یه‌ك ژ بۆ مه‌زلووم عه‌بدی یێ فه‌رماندارێ هه‌سه‌دێ شاندییه و تێده وان خوه‌ستییه كو مه‌زلووم هه‌لوه‌ست و به‌رسڤه‌ك زه‌لال ل ده‌ربارا هێرشێن په‌كه‌كێ یێن ل سه‌ر بۆریا په‌ترۆلا كوردستانێ و هێرشا سه‌ر پێشمه‌رگه‌یێن باشوور بده‌ت.
نامه‌یا شه‌رڤانان وهایه:
ئه‌م هه‌ژماره‌كه شه‌رڤانێن هێزێن سووریا ده‌مۆكراتیك، ڤێ نامه‌یا ڤه‌كری ژ بۆ مه‌زلووم عه‌بدی فه‌رماندارێ هه‌سه‌دێ دشینین، هێڤییا مه به‌رسڤه‌كا زه‌لال ل ده‌ربارا بوویه‌رێن «باشوورێ كوردستانێ» كوردستانا ئیراقێ بده‌ت.
هه‌ڤال مه‌زلووم
ئه‌م ژ بۆ پاراستنا خاكا خوه ته‌ڤلی یه‌په‌گێ و یه‌په‌ژێ بوونه، مه خوین ژ بۆ ڤێ ئامانجێ رێژتییه، مه باوه‌ری ب كوردستانێ وه‌كه وه‌لاتێ كوردان هه‌یه، ئه‌م گه‌له‌ك ب هێرشێن رۆژێن رابووری یێ په‌كه‌كێ ل سه‌ر باشوورێ كوردستانێ ئێشان و خه‌مگین بووینه، دلێ مه د سوژیت وه‌ختا كو ئه‌م ل سه‌ر ئه‌كرانێن كه‌نالێن ئاسیمانی دبینن كو رێڤه‌به‌رێن په‌كه‌كێ ب شانازی ڤه دبێژن مه بۆریا په‌ترۆلا تركیێ ته‌قاند، لێ به‌لێ ئه‌م دزانن ئه‌و هێرش ل سه‌ر به‌رژه‌وه‌ندیێن گه‌لێ مه یێ باشوورێ كوردستانێ پێكهاتییه كو ب هه‌زارێن دۆلاران زیان چێكرنه، ئه‌م ل ڤێرێ دپرسین ئه‌رێ ئه‌ڤ كار د به‌رژه‌وه‌ندییا كورد و كوردستانێ دا بوو یان په‌كه‌كێ ئه‌جێندایێن ده‌وله‌تێن دوژمنێن كوردستانێ بجهـ ئیناینه؟
ئه‌م باش دزانن مایتێكرنێن كو په‌كه‌كه دكه‌ت، نه ل ڤێ داویێ ده‌ست پێ كرنه، به‌لكو ئه‌ڤ ده‌ما 28 سالانه به‌رده‌وامن، سه‌رۆك مه‌سعوود بارزانی هه‌رده‌م رێگری ل چێبوونا شه‌ر كرییه و شه‌رێ براكوژیێ ب هێلا سۆر دانایه، هه‌روه‌ها په‌كه‌كه ل ده‌ما هێرشا داعشێ به‌شداری د شه‌رێ ته‌رۆرێ دا كر و حكوومه‌تا باشوورێ كوردستانێ سپاسییا وان كر، لێ به‌لێ پاش نه‌مانا داعشێ په‌كه‌كه ل ناڤچه‌یێ مایه و سیسته‌ما رێخستنا خوه ل سه‌ر گه‌لێ ناڤچه‌یێ فه‌رز كرییه، وان ئه‌و ناڤچه ل شوونا داعشێ داگیر كرییه.
هه‌ڤال مه‌زلووم
ئه‌م گه‌له‌ك ئێشاین وه‌ختا كو چه‌كدارێن په‌كه‌كێ ل رۆژا چارشه‌میێ 4/11/2020ێ هێرشی هێزێن پێشمه‌رگه و پۆلیسێن نه‌فت و غازێ ل ناڤچه‌یا چه‌مانكێ یا پارێزگه‌ها دهۆكێ كری كو د وێ هێرشێ دا پێشمه‌رگه‌یه‌ك ب ناڤێ هێرش جه‌وهه‌ر شه‌هید بوو و هه‌ژماره‌كه دی بریندار بوون.
هه‌روه‌ها رۆژا 5/11/2020ێ په‌كه‌كێ هێرشه‌كا دی ل ناڤچه‌یا چه‌مانكێ پێكئینا، له‌وما ل ڤێرێ ئه‌م حه‌یری ماینه، چما هوون بێده‌نگن ل سه‌ر وان تاوانێن كو هه‌ڤالێن مه یێن په‌كه‌كێ د راستا گه‌لێ باشوورێ كوردستانێ دا ئه‌نجام ددن؟ ئه‌رێ ئه‌م ڤێ بێده‌نگییا هه‌وه ب چ ئاوایی شرۆڤه بكه‌ین؟ ئه‌رێ هوون ل سه‌ر وێ ناحه‌قییا د راستا گه‌لێ مه دا دهێته كرن رازی نه؟
ئه‌ڤان پرسان ئه‌م حه‌یری هێلانه، دخوازین هوون به‌رسڤه‌كا زه‌لال و ئه‌شكه‌ره ل سه‌ر بدن
شه‌رڤانێن هێزێن سووریایا ده‌مۆكراتیك هه‌سه‌ده
5/11/2020
