په‌كه‌كه‌ ئێزدیێن شنگالێ به‌ر ب هه‌لاكه‌تێ دبه‌ت‌

په‌كه‌كه‌ ئێزدیێن شنگالێ به‌ر ب هه‌لاكه‌تێ دبه‌ت‌

باله‌فرێن ده‌وله‌تا تركیێ، دوهـی حه‌ره‌كه‌تا چه‌كدارێن په‌كه‌كێ ل دۆربه‌را شنگالێ هه‌ده‌ف كرن، هه‌ژماره‌ك ژێ قه‌تل كرن، پشتره‌ په‌كه‌كێ هنده‌ك وه‌لاتیێن ناڤچه‌یێ ل جهێ هێرشێ كۆم كرن و داخویانی ب وان دا گۆتن، وێ داخویانیێ چ په‌یوه‌ندییا وێ ب گه‌لێ ئێزدی ڤه‌ نه‌بوو، ب كورتی ئه‌و په‌یاما په‌كه‌كێ بوو، ژن و كه‌سێن كو د رێزێ دا‌ راوه‌ستایی بوون، سیمایێ وان خویا دكر كو په‌كه‌كێ ئه‌و ب دارێ زۆرێ برینه‌ جهێ هێرشێ.

په‌كه‌كه‌ كو نها شنگال و 8 گوندێن دۆربه‌را باژێری داگیر كرینه‌، ئه‌گه‌را سه‌ره‌كی یا بۆردۆمان و هێرشێن ئاسمانی یه‌، ده‌وله‌تا تركیێ ب ئاشكرایی راگه‌هاندبوو كو ئه‌و ب چ ئاوایی رێ ناده‌ن شنگال ببیته‌ قه‌ندیلا دووێ، لێ به‌لێ په‌كه‌كه‌ رژد شنگالێ وه‌ك‌ قه‌ندیلی لێ بكه‌ت و پشتره‌ ب ده‌ردێ عه‌فرینێ، سه‌رێ كانیێ و گرێ سپیێ ببه‌ت.

په‌نجه‌شێرا شنگالێ

ئێزدیێن شنگالێ ژ پاش فه‌رمانا 2014ان كو ژ ده‌ستێ ته‌رۆرا داعشێ بوو، كه‌تینه‌ د دۆژه‌ها په‌كه‌كێ دا، ده‌رئه‌نجام شنگال وێران هێلایه‌، 80% یا خه‌لكێ وێ د كامپان دا ماینه‌، ناڤچه‌ به‌رده‌وام ل ژێر هێرشێن تركیێ ‌یه‌، زارۆ و گه‌نج دهێنه‌ ره‌ڤاندن، كۆمێن چه‌كدار ل ژێر ناڤێن جودا چێكرینه‌ و مه‌ژیكێ وان ب ئایدۆلۆژییا رێكخستنا خۆ‌ شووشتی یه‌، هه‌گه‌ر په‌كه‌كه‌ راست دبێژیت كو ئه‌و ژ بۆ پاراستنا ئێزدییان ل شنگالێ نه‌، بلا به‌رسڤا ڤان پرسان بده‌ت‌:

ئه‌رێ هوون ئێزدییان ژ كێ د پارێزن؟

مانه‌ هوون ئه‌گه‌را هێرشێن به‌رده‌وام یێن تركیێ نه‌؟

هه‌تا نها هه‌وه‌ چه‌ند گه‌نجێن ئێزدی ب ده‌ستێ ده‌وله‌تا ترك قه‌تل كرینه‌؟

بۆچی هوون رێ نادن ئاواره‌یێن شنگالێ ڤه‌گه‌رن؟

بۆچی هوون دخوازن شنگال وێران و نه‌ئاڤه‌دان بمینیت‌؟

بۆچی ئێزدی كو كوردێن ره‌سه‌نن، په‌كه‌كه‌ دخوازیت‌ ناسنامه‌یا وان ب گوهه‌رینیت‌؟

بۆچی په‌كه‌كه‌ رێزێ ل ئۆلا ئێزدییان ناگریت‌ و هه‌ر كه‌س دزانیت كو ل شنگالێ ئه‌و حه‌نه‌كان ب ئۆلا وان دكه‌ن‌؟

په‌كه‌كێ د 40 سالێ شه‌رێ خوه‌ یێ چه‌كداری دا كانێ چه‌ند مه‌ترێن خاكا باكورێ كوردستانێ پاراستینه‌، دێ هند شنگالێ و ئێزدیێن شنگالێ پارێزیت‌

یا راست بلا گه‌لێ ئێزدی باش بزانیت، ئه‌گه‌را سه‌ره‌كی‌ یا ئیسرارا په‌كه‌كێ كو د شنگالێ دا‌ بمینیت‌، بجهـ ئینانا ئه‌جێندایێن ده‌وله‌تێن تركیێ، ئیرانێ و ئیراقێ یه‌، رێككه‌فتنا شنگالێ ژی كو تام د به‌رژه‌وه‌ندییا ئێزدییان دا یه‌، په‌كه‌كه‌ ناخوازیت بهێته‌ بجهـ ئینان ژ به‌ر كو ئه‌و رێككه‌فتن دێ په‌كه‌كێ ناچار كه‌ت شنگالێ چوول بكه‌ت، ب گۆتنه‌كا‌ دی، په‌كه‌كه‌ ل سه‌ر برینێن گه‌لێ ئێزدی ده‌ستكه‌فتییان ب ده‌ست دئێخیت و خۆ د پارێزیت‌.

ل دوماهیێ ئه‌م دبێژین، پێدڤییه‌ گه‌لێ شنگالێ نه‌بیته‌ دارده‌ست و یارییا د ده‌ستێ په‌كه‌كێ دا، په‌كه‌كه‌ دێ وان به‌ر ب هه‌لاكه‌تێ به‌ت، ئیرۆ بیت‌ یان سبه‌ ل گه‌ل په‌كه‌كێ دێ چاره‌نڤیسا شنگالێ وه‌ك عه‌فرینێ و سه‌رێ كانیێ لێ هێت،  خه‌باتا ده‌هان سالێن په‌كه‌كێ شاهدێ هه‌ره‌ مه‌زنه‌ ژ بۆ ڤێ ئاخفتنا مه‌، كانێ په‌كه‌كێ د 40 سالێن شه‌رێ خۆ‌ یێ چه‌كداری دا‌ چه‌ند مه‌ترێن خاكا باكورێ كوردستانێ سه‌ربه‌ست كرینه‌، دێ هند شنگالێ و ئێزدیێن شنگالێ سه‌ربه‌ست كه‌ت.

پوستێن ھەمان بەش