ب ئه‌گه‌را په‌كه‌كێ ده‌ڤه‌را به‌رواری بالا هات بۆردۆمان كرن

ئارته‌شا تركیێ ئیرۆ ژ سینۆرێ باكورێ كوردستانێ ده‌ڤه‌را به‌رواری بالا یا باشوورێ كوردستانێ تۆپباران كر و 4 مووشه‌ك ل دۆربه‌را گونده‌كێ ده‌ڤه‌رێ دانه‌.

چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره‌ كر، ئیرۆ رۆژا سێشه‌می 10/11/2020ان، ئارته‌شا تركیێ نوقته‌یێن په‌كه‌كێ ل ده‌ڤه‌را به‌رواری بالا ژ سینۆرێ باكورێ كوردستانێ هه‌ده‌ف كرنه‌ و 4 مووشه‌ك لێ خستنه‌.

ده‌ست نیشان كر، ئه‌ڤ ئێریش ل ده‌مژمێر 12:30 نیڤرۆژێ چێبوویه‌ و هه‌یا ده‌مژمێر 1:00 ده‌وام كرییه‌، ئارته‌شا تركیێ 4 مووشه‌ك ل نوقته‌یێن په‌كه‌كێ ل دۆربه‌را گوندێ دویرێ یێ ناحیا كانی ماسێ گرێدای ده‌ڤه‌را به‌رواری بالا دانه‌.

پارتییا كاركه‌رێن كوردستانێ هه‌ركو دچه‌ حه‌ره‌كه‌تا چه‌كدارێن خوه‌ تێخه‌ نێزی گوند و باژارۆكێن باشوورێ كوردستانێ ب وێ ئامانجێ كو ئه‌ڤ گوند وه‌ر‌ن چول كرن و ببن مه‌یدانا شه‌ر، ئه‌ڤ سیاسه‌تا په‌كه‌كێ ژ پاش ئێریشا 15 خزیرانا ئیسالێ ب زه‌لالی ده‌ركه‌تییه‌ و ژ وێ ده‌مێ پێتری 50 گوندان هاتنه‌ چول كرن.