دەزگەھێ رەوشەنبیری و راگەھاندنا پارتیا دیمۆکراتا کوردستانێ (پەدەکی) ب داخویانیەکێ بەرسڤا رێڤەبەرێن پارتیا کارکەرێن کوردستانێ (پەکەکێ) و زۆزان چەولک ددەت و دیار دکەت کو چ جاران ئارمانجا پەکەکێ حەتا نھا پرسا کورد نەبوویە، ئەگەر ل جھەکی پرسا کورد خستبیتە ناڤ رستەیێ دا ژی، ژ بۆ سەرگەرمکرن و جوانکرنا پاراگرافێن سیاسی و میدیایی بوویە.
دەزگەھێ رەوشەنبیری و راگەھاندنا پارتی دەستنیشان کر: “کۆمیتەیا رێڤەبەریا پارتیا کارکەرێن کوردستانێ (پەکەکێ) د ٤٢یەمین سالڤەگەرا دامەزراندنێ دا و ھەروھا زۆزان چەولک ل ناڤەندا پاراستنا گەل، دوور ژ مەنتق و راستبینیێ، بەحسا پرسگرێکا ب ھەرێما کوردستانێ ڤە پەیوەندیدار، رۆلا پارتیا دیمۆکراتا کوردستانێ (پەدەکێ) و جەنابێ سەرۆک مەسعوود بارزانی دکەن، ب تایبەتی د شیرۆڤەکرنا بوویەران دا و ھەروەھا ئیستیفزاز و شەرفرۆشیێن پەکەکێ ب ھەرێما کوردستانێ، وەکو ھەر دەم کەتیە ناڤ خەلەتیا دیرۆکی و سیاسی و حەتا خەلەتیا رەوشەنبیریێ ژی.”
د داخویانیێ دا ھاتیە ئاشکەراکرن: “دڤێت پەکەکە ڤێ راستیێ بزانیت کو خەلکێ تێکۆشەر و دلسۆزێ کوردستانێ ژ ماھیەت و حەقیقەتا پەکەکێ تێگھشتنە و دزانن، ژ بۆ چ و ب چ مەرامەک، ئەو مەراما کو خزمەتا ناحەزێن گەلێ کورد دکەت، پەکەکێ قادا راستەقینا خەباتێا ل باکورێ کوردستانێ ب جھ ھشتیە و ھاتیە باشوورێ کوردستانێ و پەڤچوون و شەرا ب حکوومەتا ھەرێما کوردستانێ و سازیێن وێ یێن فەرمی دفرۆشیت.”
دەزگەھێ رەوشەنبیری و راگھاندنا پارتی دیار کریە: “راستیەکا دیرۆکی ھەیە، کو دڤێت ئەم بەحس بکین، راستی ژی ئەوە کو پەکەکە ژ دەستپێکا دامەزراندنێ ڤە حەتا نھا نەکاریە وەکو ھێزەکا نەتەوی، خەباتا سیاسی و ئازادیخواز بدۆمینیت و ل قادا خوە یا راستەقینە، نەخشەیا وێ ھەبیت، نەخشەیەک کو ل سەر جڤاکا دیمۆکراسی و مۆدەرنا ژیانا سیاسی یا ھەڤدەم ھاتبیتە نەخشاندن، دا کو سەرنجا دنیایا نوو بکێشیتە سەر خوە و دۆست و پشتەڤان ژ بۆ دۆزا رەوایا گەلێ کورد کۆم بکەت. لێ پەکەکە نە تەنێ نەخواست وێ رۆل و نەخشەیێ ببینە، بەرەڤاژی وێ، رۆلەکە نەگاتیڤا وەها ئەنجام دا کو نیقاەک دەمدرێژ دڤێت و ئەم دێ ل ڤێرە تەنێ ئاماژە ب وێ رۆلا نەگاتیڤ کین، کو ژ شەرفرۆشیا ب خەلکێ کوردستانێ و دژایەتیکرنا پەرلەمان و حکوومەتا ب دەمۆکراسی ھاتیە ھلبژارتنا ھەرێما کوردستانێ پێک تێت.”
دەزگەھێ رەوشەنبیری و راگەھاندنا پارتی د داخویانیا خوە دا ئاشکەرا کریە: “سیاسەتا پەکەکێ سیاسەتەکا نە نەتەوی یە. پەکەکە چەندین جاران بوویە سەدەما شەر و خوینرژاندنا کوردان و زیانا مەزن ل دۆزا رەوایا کورد دایە، رژدبوونا ل سەر ھەمان سیاسەتا نە نەتەوی، ژ بۆ ھەموو دلسۆز و دیمۆکراسیخوازان بوویە جھێ پرسیار و گومانێ، پرسیار و گومانەک کو رۆژ ب رۆژ پەکەکێ لاوازتر دکەت!.. لاوازبوونەک کو ھەر کو دچیت پەکەکێ زێدەتر تێخیتە هەمبێزا نەحەزێن کورد و کوردستانێ و ئەو ژی کارێن عەجێب پێ دکن. کارێن کو د هیچ مەنتقەکێ دا جھێ وان نینە، وەکو؛ رەڤاندنا زارۆکان، تێکدانا پران، خرابکرنا گوندان، ئەزیەتدانا جۆتکاران و شەوتاندنا رەز و باخچەیان، حەتا دگەهیتە راوەستانا ل بەر پەرلەمان و حکوومەتا ھەرێما کوردستانێ، کو دەستکەفتا خوینا شەھیدانە.”
د داویا داخویانیێ دا ھاتیە دیارکرن: “پشتی دروستبوونا قەوارەیا رەوایا ھەرێما کوردستانێ، پەکەکێ سیاسەتا ل دژی پارتی و بارزانی گرتە بەر خوە و جێبەجێکرنا ھەموو پلان و سیاسەتێن د ڤی واری دا گرتیە ستوویێ خوە. چار گەرێن شەرێن پەکەکێ یێن ل دژی پارتیا دیمۆکراتا کوردستانێ و یەکیتیا نشتمانییا کوردستانێ د سالێن 90ێ دا بەسن و بەلگەنە، ژ بۆ ئیسباتکرنا وێ راستیێ.”
