ل دیاربەکرێ ژ لایێ 200 رەوشەنبیر، نڤیسکار و سیاسەتمەداران داخویانیەک دەربارێ ئێریشێن پەکەکێ ل سەر ھەرێما کوردستانێ ھاتە بەلاڤکرن.
د چەند رۆژێن دەرباسبوویی دا چەکدارێن پارتیا کارکەرێن کوردستانێ (پەکەکێ) ل سینۆرێ ناحیا چەمانکێ یا سەر ب ناڤچەیا ئامێدیێ، سێ ئێریشێن جودا برنە سەر ھێزێن پێشمەرگەیێن کوردستانێ و پۆلیسێن پاراستنا پەترۆل و گازێ، د ئەنجاما وان ئێریشان دا پێشمەرگەیەک شەھید بوو و ھەژمارەک پێشمەرگە و پۆلیس بریندار بوون.
د داخویانیێ دا، وان رەوشەنبیر، نڤیسکار و سیاسەتمەداران دەستێوەردانا پەکەکێ د ناڤا کارووبارێن ھەرێما کوردستانێ دا شەرمەزار کر و گۆتن کو ھەژمارەک ژ گوندان ژ بەر ھەبوونا پەکەکێ ڤالا بوونە.
ھەروھا تەکەز کرن، ئارمانجا سەرەکەیا پەکەکێ، ژناڤبرنا قەوارەیا ھەرێما کوردستانێیە.
ھەروھا داخواز ژ پەکەکێ کرن، دەملدەست ژ ھەرێما کوردستانێ ڤەکشن و رێزێ ل سەروەریا ھەرێما کوردستانێ بگرن.
ئێریشێن چەکدارێن پەکەکێ ل سەر ھەرێما کوردستانێ، گەلەک نەرازیبوون ل سەر ئاستا ناڤخوەیی و ناڤدەولەتی ل پشت خوە ئانین. بەری چەند رۆژا ژی 400 رەوشەنبیر، نڤیسکار و سیاسەتمەدارێن باکورێ کوردستانێ بانگ ل پەکەکێ کربوو کو سەروەرییا رێڤەبرییا ھەرێما کوردستانێ ناس بکەن و رێ ژ ئێریش و دەستێوەردانا دەولەتێن داگیرکار ل سەر باشوورێ کوردستانێ خوەشتر نەکەت.
