پارلمه‌نا ئیراقێ ئیرۆ سه‌رێ سبێ یاسایا قه‌رز په‌ژراند و به‌شا باشوورێ كوردستانێ تێدا نه‌هات زه‌لال كرن و برینا مووچه‌یا فه‌رمانبه‌رێن باشوورێ وه‌لات ب ده‌نگێن ئه‌ره‌بێن شیعه و سوننه هات ئه‌رێ كرن.
ل شه‌ڤا ده‌رباسبووی، پارلمه‌نا ئیراقێ جڤییا و پاش نیقاشێن پر دژوار ل نێڤبه‌را پارلمه‌نته‌رێن كورد و ئه‌ره‌ب ل ده‌ربارا به‌شا باشوورێ كوردستانێ یا مووچه‌یا فه‌رمانبه‌ران، یاسایا قه‌رز ژ بۆی پاره‌دار كرنا كورتهێنانا د بوجه‌ی دا هات ئه‌رێ كرن، به‌شا هه‌رێما باشوورێ كوردستانێ ب پیلانه‌كه پارلمنته‌رێن عه‌ره‌ب یێن شیعه و سوونه ته‌ڤلی ڤێ یاسایێ نه‌هات كرن و یاسا بێ ره‌زامه‌ندییا كوردان ب ده‌نگێ پرانیێ هات ئه‌رێ كرن.
خالا ناكۆك ل نێڤبه‌را هه‌ولێر و به‌غدایێ د ڤێ یاسایێ دا ئه‌ڤ بوو، كو ئالیێن شیعه و سوننه خوه‌ستن ب هه‌ر رێیا هه‌به، به‌شا بودجه‌یا باشوور نه‌یێ شاندن، له‌وما په‌یمانا نێڤبه‌را هه‌ولێر و به‌غدایێ ئه‌وا كو ل سالا رابووری هاتییه ئیمزه كرن كو هه‌رێما باشوور رۆژانه 250 هه‌زار به‌رمیلێن په‌ترۆلێ ب رێیا شركه‌تا سۆمۆ یا ئیراقێ بشینه ده‌رڤه وه‌لات و ل همبه‌ری ڤێ، حكوومه‌تا به‌غدایێ ب 320 ملیار دیناران ژ بۆ باشوورێ كوردستانێ بشینه كو ئه‌ڤ كوژمه دبیته به‌شه‌ك ژ مووچه‌یێ فه‌رمانبه‌رێن حكوومه‌تا كوردستانێ.
لێ به‌لێ ل شه‌ڤا ده‌رباسبوویی ئالیێن شیعه و سوننه و ل گۆر پیلانكه‌كه ژێر ب ژێر ئه‌ڤ په‌یمان شكاند و مه‌رجێن هه‌ری زه‌حمه‌ت ل سه‌ر باشوور ل همبه‌ری شاندنا مووچه‌یێ فه‌رمانبه‌رێن كوردستانێ د یاسایێ دا ب جی كر، ئالیێن ئه‌ره‌ب خوه‌ستن ل جیێ 250 هه‌زار به‌رمیلێن په‌ترۆلێ، باشوورێ كوردستانێ 480 هه‌زار به‌رمیلان ب رێیا شركه‌تا سۆمۆ بشینه ده‌رڤه.
پارلمه‌نته‌رێن كورد هولا پارلمه‌نا ئیراقێ ب جی هشتن و ئه‌ڤ یاسا بێ ره‌زامه‌ندی و ئیراده‌یا گه‌لێ باشوور هات ئه‌رێ كرن.
تێ زانین به‌غدا ئه‌ڤ ده‌ما 12سالانه ئانكو ژ سه‌رده‌ما حكوومه‌تا نووری مالكی سیاسه‌تا برسی كرنا گه‌لێ باشوور ده‌ست پێ كرییه و ئه‌ڤ سیاسه‌ت هه‌یا رۆژا مه یا ئیرۆ ده‌وام دكه، ئه‌ڤ ژی ب وێ واتایێ تێ كو ئیراق ته‌نێ د سیاسه‌تا برسی كرنا گه‌لێ باشوور دا خورت و لێهاتییه.
