نه‌رینگه‌ها سووری ژ رێڤه‌به‌رییا خوه‌سه‌ر دخوازیت ده‌ست ژ چه‌كدار كرنا زارۆیان به‌رده‌ت

نه‌رینگه‌ها سووری ژ رێڤه‌به‌رییا خوه‌سه‌ر دخوازیت ده‌ست ژ چه‌كدار كرنا زارۆیان به‌رده‌ت

ب سه‌ده‌ما به‌رده‌وامییا چه‌كدار كرنا زارۆ و جوانێن ژێر 18 سالیێ، ژ رێڤه‌به‌رییا خوه‌سه‌ر تێ خوه‌ستن ده‌ست ژ ره‌ڤاندنا زارۆیان به‌رده‌ت‌.

نه‌رینگه‌ها سووری یا مافێن مرۆڤان بانگه‌وازییه‌ دایه‌ رێڤه‌به‌رییا خوه‌سه‌ر یا باكور و باكورێ رۆژهلاتا سووریێ و هه‌روه‌ها هێزێن سووریایا ده‌مۆكراتیك و تێده‌ ژێ خوا‌ستییه‌، بلا ئێدی ده‌ست ژ چه‌كدار كرنا زارۆیان به‌رده‌ و ب به‌هانه‌یا رێخستنێن «جوانێن شۆره‌شگێر» ئێدی زارۆیان نه‌ره‌ڤینیت‌.

نه‌رینگه‌ها سووری د بانگه‌وازیێ ده‌ گۆتییه‌: «ژ به‌ر كو رێڤه‌به‌رییا خوه‌سه‌ر و هێزێن هه‌سه‌دێ ده‌ستهلاتدارێن ناڤچه‌یێن باكورێ رۆژهلاتا سووریێ نه‌، پێویسته‌ ئه‌و ده‌ست ژ ره‌ڤاندنا زارۆیان و چه‌كدار كرنا وان د ناڤا رێخستنێن جوانێن شۆرشگێر ده‌ به‌رده‌ن»‌.

نه‌رینگه‌ها سووری ده‌ست نیشان كر ئه‌و دێ ب ئاوایه‌كی به‌رده‌وام سه‌رپێچی و پێشێلكاریێن رێڤه‌به‌رییا خوه‌سه‌ر د ڤێ ده‌ربارێ ده‌ ئه‌شكه‌ره‌ كه‌ن.

هه‌روه‌ها ئه‌شكه‌ره‌ كر، چه‌كدارێن رێخستنا «جوانێن شۆره‌شگێر» یێن گرێدای رێڤه‌به‌رییا خوه‌سه‌ر، ل 10 ڤێ مه‌هێ جوانه‌كێ 14 سال ژ گونده‌وارێ حه‌سه‌كێ ره‌ڤاندنه‌ و ژ بۆ سه‌ربازگه‌هێن هه‌سه‌دێ هاتییه‌ ڤه‌گوهاستن و گۆت: «ئه‌ڤ جوان ب ناڤێ (س . خ) كو ژ بال چه‌كداره‌كێ هاتییه‌ ره‌ڤاندن و راده‌ستی فه‌رماندارێ رێخستنێن جوانێن شۆرشگێر كرییه»‌.

هێزێن سووریایا ده‌مۆكراتیك ژ ناڤه‌راستا ئیسالێ ڤه‌، خزمه‌تا سه‌رباز كرنا ب زۆر راگه‌هاندبوو، پشتره‌ پۆلیسێن سه‌ربازی ب ده‌سته‌سه‌ر كرنا جوانان ئه‌ركدار كر، ل رۆژێن ده‌ستپێكێ ب سه‌دان گه‌نجێن ده‌رباسیێ، تل ته‌مرێ و هنه‌ك ناڤچه‌یێن دی یێن رۆژهلاتا فراتێ هاتن ده‌سته‌سه‌ر كرن.

ل ڤێ داویێ ژی ب سه‌دان جوان و زارۆ ژ حه‌سه‌كێ، حه‌له‌بێ، ره‌ققایێ و دێرا زوورێ هاتنه‌ ده‌سته‌سه‌ر كرن، لێ به‌لێ پرانی ژێ یێن حه‌سه‌كێ و ده‌ردوورا وێ نه‌.