پرسگرێكا ئه‌نه‌كه‌سێ نه‌زمانێ كوردیه‌، به‌لكو ئایدۆلۆژییا گه‌نی یا قه‌ندیلێ یه‌

پرسگرێكا ئه‌نه‌كه‌سێ نه‌زمانێ كوردیه‌، به‌لكو ئایدۆلۆژییا گه‌نی یا قه‌ندیلێ یه‌
  • نڤیسكار: جه‌مال حه‌مێ

سالح موسلم، هه‌ڤسه‌رۆكێ به‌رێ یێ پارتییا یه‌كێتییا ده‌مۆكراتیك په‌یه‌دێ بۆ ئاژانسا هاوار يا گرێدای په‌كه‌كێ گۆتییه‌ كو د ناڤا وان مه‌رجێن زه‌حمه‌ت كو ئه‌نجوومه‌نا نشتیمانییا كوردی ئه‌نه‌كه‌سێ ل به‌ر دانوستا‌ندنێن رێكخستنا مالا كوردی كو ئه‌م چ جاران قه‌بوول ناكه‌ین، پرسا زمانێ كوردی یه‌ د په‌یره‌وێن خواندنێ دا، سالح پرسی یه‌ ئه‌رێ ب چ ئاوا ئالییه‌ك كو بانگه‌شه‌یا هزرا نه‌ته‌وه‌یی یا كوردی دكه‌ت‌، پرسا زمانێ كوردی ل گه‌ل مه‌ نیقاش دكه‌ت‌! هه‌گه‌ر زارۆكێن مه‌ زمانێ خوه‌ یێ دایكێ نوكه‌ و د ڤێ ره‌وشێ دا فێر نه‌بن، پا دێ كه‌نگی فێر ببن؟

وه‌ك‌ دیار، گۆتنێن سالح موسلم راستن، لێ به‌لێ وه‌كو هه‌رده‌م ئارمانجه‌كا‌ ڤالا و به‌تال ل پشته‌، به‌ره‌ڤاژی كرنا رایا گشتی ل پشته‌، ژ به‌ر كو پرسگرێكا ئه‌نكه‌سێ نه‌ ل گه‌ل زمانی كوردی یه‌، به‌لكو ل گه‌ل ئایدۆلۆژییا گه‌نی یا قه‌ندیلێ یه‌، ئه‌و ئایدۆلۆژییا كو ب ئاوایه‌كی سیستماتیك دكه‌ڤیته‌ د ناڤا په‌یره‌وێن خواندنێ دا و ب گوهێ زارۆكێن كوردان دا‌ دهێته‌ گۆتن و مه‌ژیكێ وان پێ دهێته‌ شووشتن ب به‌هانه‌یا وێ یه‌كێ كو ئه‌ڤه‌ زمانێ كوردی یه‌، ئه‌ڤ ژی كۆكا مژارێ  و ژبه‌ر ڤێ ئه‌نه‌كه‌سێ نه‌رازیبوونا خوه‌ ل سه‌ر فێركرنا زمانێ كوردی ب وی ئاوایی دیار كرییه‌.

ئه‌گه‌را دووێ سالح موسلم و هه‌ڤالێن وی یێن د رێڤه‌به‌رییا خوه‌سه‌ر دا‌ نه‌ كو پرۆژه‌یا رێڤه‌به‌رییا خوه‌سه‌ر د ئه‌ساس دا‌ به‌رگریێ ژ یه‌كپارچه‌یا خاكا سووریێ دكه‌ت‌ و پا‌رچه‌بوونا سووریێ ره‌د دكه‌ت، به‌لكو پتر ئه‌ڤ رێڤه‌به‌رییه‌ فه‌درالیێ ژی ژ بۆ كوردان ناخوازت‌، خوه‌ رێناده‌ت‌ رێڤه‌به‌رییه‌كا ب كراسه‌كێ نه‌ته‌وه‌یی یێ كوردی ژی چێببیت، له‌وما ئه‌و خوه‌ وه‌ك به‌شه‌ك ژ سووریێ حساب دكه‌ت و داخوازێ ژ گه‌لێ كورد دكه‌ت كو ده‌ست ژ ئارمانجا ئاڤاكرنا ستاتۆیا كوردی به‌رده‌ن و وان داخواز دكه‌ت‌ كو ل گه‌ل جڤاكا سووریێ ل ژێر ناڤێ «براتییا گه‌لان» ب حه‌لینیت.

له‌وما و ژ به‌ر كو زمانێ ئه‌ره‌بی ب زمانێ فه‌رمی یێ ده‌وله‌تا سووریێ یه‌، وه‌زاره‌تا په‌روه‌ردێ دانپێدانی ب چ زمانێن دی بۆ خواندنێ ناكه‌ت و باوه‌رنامێ ل سه‌ر ئه‌ساسێ زمانێ فه‌رمی دده‌ته‌ خویندكاران، رێڤه‌به‌رییا خوه‌سه‌ر ژی دانپێدانێ ب په‌یره‌وێن خواندنێ یێن سووریێ ناكه‌ت و رێناده‌ت خویندكارێن كورد زمانێ ئه‌ره‌بی ل گه‌ل یێ كوردی ب هه‌ڤرا‌ ل خواندنگه‌هان بخوینن، ئه‌ڤه‌ ژی ب وێ واتایێ دهێت كو خویندكارێن كورد پاش ته‌مام كرنا خواندنێ باوه‌رنامه‌یا وان ژ بال سووریێ ڤه‌ دانپێدان پێ ناهێته‌ كرن و شیانێن وان دا‌ نابیت ل چ سازییه‌كا ده‌وله‌تێ وه‌زیفه‌دار ببن، چاره‌نڤیسا وان دێ بیته‌ پاله‌تی، جۆتكاری و خزمه‌تگوزارێن رێستورانتان.

له‌وما سالح موسلم و هه‌ڤالێن وی دكارن ژ مه‌ره‌ ببێژن ل كیژان وه‌لاتی دێ دانپێدان ب باوه‌رنامه‌یێن رێڤه‌به‌رییا خوه‌سه‌ر هێته‌ كرن؟ ئه‌رێ چاره‌نڤیسا نفشه‌كێ ته‌مام كو خواندی و زه‌حمه‌ت دیتی دێ ب كۆده‌رێ دا چیت؟، ئه‌رێ ئه‌و دێ باوه‌رنامێن خوه‌ داننه‌ سه‌ر ره‌فێ و بێ پێشه‌رۆژ مینن؟ ژ به‌ر كو نه‌ ل ناڤا سووریێ و نه‌ ل ده‌رڤه‌ی سووریێ دانپێدان پێ ناهێته‌ كرن.

هه‌روه‌ها ئه‌ڤ خویندكارێن كو ئایدۆلۆژییا په‌كه‌كێ ب هێنجه‌تا زمانێ كورد ل دبستانێن رێڤه‌به‌رییا خوه‌سه‌ر خوا‌ندی دێ ب چ ئاوا ل گه‌ل سوورییان ره‌فتارێ بكه‌ن ژ به‌ركو وان نه‌ زمانێ عه‌ره‌بی خوا‌ندییه‌ نه‌ژی دزانن پێ بئاخڤن و بنڤیسینن، ئه‌رێ ما ئه‌ڤ سیاسه‌تا رێڤه‌به‌رییا خوه‌سه‌ر نابیته‌ ئه‌گه‌رێ چێكرنا نفشه‌كی كو ببن بارگرانی ل سه‌ر جڤاكێن كوردی و سووری؟

پرسا سه‌ره‌كی ل ڤێرێ ئه‌ڤه‌یه‌، رێڤه‌به‌رییا خوه‌سه‌ر ب چ ئاوا دخوازیت‌ ل گه‌ل ده‌وله‌تا سووریێ بیت و د هه‌مان ده‌م دا رێنه‌ده‌ت جوانێن كوردان فێری زمانێ عه‌ره‌بی ببن؟

ئه‌رێ هوین دزانن پرسا كو زارۆكێن مه‌ فێری زمانێ كوردی ببن چ گرنگییا خوه‌ ل جه‌م رێڤه‌به‌رییا خوه‌سه‌ر نینه‌، به‌لكو تشتێ كو ئه‌ڤ تاخمه‌ گرنگیێ پێ دده‌ن تنێ ئه‌ڤه‌یه كو پێدڤییه‌ ئه‌و زمان و ئایدۆلۆژییا كوردی ل خواندنگه‌هان بهێته‌ خواندن ئه‌وا كو ژ قه‌ندیلێ دهێته‌ شاندن، رێڤه‌به‌رییا خوه‌سه‌ر دخوازیت‌ زارۆكێن مه‌ ب وێ ئایدۆلۆژیێ ڤه‌ گرێدن و هێژان ژ ته‌مه‌نه‌كێ‌ زوو زارۆكێن مه‌ ب وێ ئایدۆلۆژیێ ڤه‌ په‌روه‌رده‌ بكه‌ن، هه‌تا وێ ده‌مێ مه‌زن دبن و پشتره‌ ژ بۆ سه‌ربازگه‌هێن په‌كه‌كێ دهێنه‌ ره‌ڤاندن، له‌وما ئه‌ڤه‌ ئه‌گه‌را سه‌ره‌كی یه‌ كو ئه‌نه‌كه‌سه‌ دخوازیت خواندنا زمانێ كوردی ل خواندنگه‌هان نه‌ ل ژێر سه‌رپه‌رشتییا قه‌ندیلێ بیت، ژ بۆ كو زێده‌تر ئایدۆلۆژییا گه‌نی یا په‌كه‌كێ ب گوهێ زارۆكێن مه‌ دا نه‌هێته‌ بانگ كرن.