کەنالێ سی ئێن ئێن یێ ئەمریکی ژ زارێ 2 بەرپرسێن وی وەلاتی ڤەگوھاستیە، کۆشکا سپی داخواز ژ وەزارەتا بەرگریێ کریە، ئامادەکاریێن تەمام بۆ ڤەکشاندنا بلەز یا بەشەک ژ ھێزێن ئەمریکایێ ژ ئیراق و ئەفغانستانێ بکن.
ژێدەران گۆتیە، کۆشکا سپی و پێنتاگۆنێ پێکبە دەربارێ مەترسیێن داعشێ گۆتووبێژکرنە و کۆشکا سپی رژدە دا کو ھێزێن خوە ژ ئیراق و ئەفغانستانێ ڤەکێشیت و پێنتاگۆنێ ژی، پلانا ڤەکشاندنێ دانایە.
ڤێ حەفتەیێ دۆنالد ترامپ، دێ بریارا ڤەکشاندنا ھێزێن ئەمریکا دەت و ھەژمارا لەشکەرێن خوە ل ئیراق و ئەفغانستانێ بۆ 2 ھەزار و 500 لەشکەران کێم دکەت. بریارا کێمکرنا لەشکەرێن ئەمریکی ل ئیراق، سوریێ و ئەفغانستانێ حەتا 15ێ چلە دێ هێتە جێبەجێ کرن.
ئەڤ بریارە د دەمەکێ دایە، دەستپێکا ڤێ حەفتەیێ کریستۆفەر میڵەر ژ لایێ ترامپ ڤە ل جھێ مارک ئەسپەر وەکی وەزیرێ بەرگرییێ ئەمریکا ب وەکالەت ھاتە دانان. پشترس مڵەر نامەیەک بۆ بەرپرس و کارمەندێن پێنتاگۆن شاند و تێ دا نیەتا خوە بۆ ڤەکشاندنا ھێزێن ئامەریکا، ژ ئەفغانستان و ناڤچەیێن دی ل رۆژھلاتا ناڤەراست دیار کر و گۆت، دەما وێ یەکێ ھاتیە، بزڤرینە وەلاتێ خوە. نھا ئەمریکا 4 ھەزار و 500 لەشکەر ل ئەفغانستان و 3 ھەزار لەشکەر ل ئیراقێ ھەنە.
ناتۆ ژی، ھشیاری ژ ڤەکشاندنێ دا و راگھاند، ئەگەر ئەمریکا ژ ئیراق و ئەفغانستانێ ڤەکێشیت، دێ باجەک مەزن هەبیت.
