په‌كه‌كێ كوڕ خاپاند و دلێ دایكێ شه‌وتاند

رێخستنا په‌كه‌كێ كوڕ خاپاند و دلێ دایكێ شه‌وتاند

پارتییا كاركه‌رێن كوردستانێ ژ بۆ چێكرنا شه‌رڤانان، ژ ده‌ستپێكا دامه‌زراندنا خوه‌ پشت به‌ستنێ ل سه‌ر ره‌ڤاندن و خاپاندنا كه‌چ، زاڕۆ و سنێله‌یێن كورد ژ هه‌ر چار په‌رچه‌یێن كوردستانێ دكه‌ت و دلێ هه‌زاران دایكێن كوردان شه‌وتاندنه‌، «سه‌لیما» یه‌ك ژ وان دایكێن كورده‌ كو ژ باكورێ كوردستانێ ده‌رباسی شنگالێ بوویه‌ ژ بۆ كو ئاگاهییه‌كێ ژ كوڕێ خوه‌ م«حه‌مه‌د»ی بزانه‌ ئه‌وێ ل سالا 2016ێ په‌كه‌كێ ب رێیا خاپاندنێ ئه‌و رازی كری ته‌ڤلی رێخستنێ ببیت.

چاڤكانیێن پێگه‌ها داركا مازی ل باشوورێ كوردستانێ، سه‌رهاتییا راست یا ڤێ دایكا كورد شاندییه‌، كانێ ب چ ئاوا وێ مالا خوه‌ ل باكور هێلایه‌ و كه‌تییه‌ د باژار و باژارۆكێن باشوورێ كوردستانێ دا ته‌نێ ژ بۆ كو ب دیتنا كوڕێ خوه‌ شاد ببیت، یان هه‌ر هیچ نه‌بیت، ئاگاهییه‌كێ ژ چاره‌نڤیسا وی بزانیت‌، لێ به‌لێ په‌كه‌كێ دلێ وێ دایكێ سۆت و نه‌هێلا ئه‌و چ ئاگاهییان ژ چاره‌نڤیسا كوڕێ خوه‌ بزانیت.

«محه‌مه‌د عادل ره‌زا»، جوانه‌كێ باكورێ كوردستانێ یه‌، ئه‌و ل سالا 2016ێ ژ بال په‌كه‌كێ ڤه‌ دهێته‌ خاپاندن و رازی كرن كو ته‌ڤلی رێزێن گه‌ریلایان ببیت، پاش ده‌رباسبوونا ده‌مه‌كێ كێم «محه‌مه‌د» پووشمان دبیت و هه‌ول دده‌ت رێزێن رێخستنا په‌كه‌كێ ب جهـ بهێلیت‌، لێ به‌لێ په‌كه‌كه‌ رێ ناده‌تێ ئه‌و ڤێ هه‌نگاڤێ بهاڤێژیت.

«محه‌مه‌د عادل» ل مه‌ها 10 یا ئیسال 2020ێ، په‌یوه‌ندی ب دایكا خوه‌ كربوو، ناڤێ دایكا وی «سه‌لیما ئه‌حمه‌د عه‌بدوللا» یه‌، وی ژ دایكا خوه ‌ره‌ گۆتبوو كو ئه‌و ل باشوورێ كوردستانێ یه‌ و دخوازیت‌ ژ په‌كه‌كێ ڤه‌قه‌تیت، لێ به‌لێ په‌كه‌كێ نه‌هێلا و وه‌ك جه‌زا پیێ وی شكاندینه‌ و ئه‌و ئێخستینه‌ د زیندانه‌كێ دا ل ده‌ڤه‌را شنگالێ.

«محه‌مه‌د» ژ دایكا خوه‌ ره‌ گۆتبوو ئه‌و ل گوندێ «بارێ» یێ گرێدای شنگالێ زیندان كرییه‌، دایكا دل سۆتی هه‌ر د زوو دا‌ مالا خوه‌ ل باكور هێلا و به‌ر ب باشوورێ وه‌لات كه‌ته‌ رێ، ژ بۆ كو ئاگاهییه‌كی ژ كوڕێ خوه‌ یێ به‌له‌نگاز بزانیت.

چاڤكانیێن پێگه‌ها داركا مازی ده‌ست نیشان كر كو «سه‌لیما» یا دایكا «محه‌مه‌د» ل داوییا مه‌ها رابووری ب رێیا ده‌ریێ سینۆر یێ ئیبراهیم خه‌لیل ده‌رباسی باشوورێ وه‌لات بوویه‌، ئه‌و ژ بۆ ده‌ما 4 رۆژان ل باژارێ زاخۆ ما، پشتره‌ چوویه‌ دهۆكێ، هه‌ولێرێ و پشتره‌ مووسلێ و ژ ور كاری ده‌رباسی سنۆرێ شنگالێ ببیت، لێ به‌لێ ئه‌ڤ هه‌ولێن وێ ژ بۆ دیتنا كوڕێ وێ بێ ئه‌نجام مان و په‌كه‌كێ نه‌هێلا ئه‌و ب دیتنا «محه‌مه‌د» شاد ببیت، یان هه‌ر هیچ نه‌بیت ئاگاهییه‌كێ ژێ بزانیت.

پارتییا كاركه‌رێن كوردستانێ ب هه‌زاران جینایه‌تێن هه‌مئاوا ئه‌نجام داینه‌، ب هه‌زاران كه‌چ، زارۆ و سنێله‌ ل ژێر ناڤێ سه‌رخوه‌بوونا كوردستانێ خاپاندنه‌، ب هه‌زاران زارۆ ژ هه‌مبێزا دایكێن كورد ره‌ڤاندنه‌، یا راست كه‌چ و جوانێن كورد ژ بۆ عه‌شقا كوردستانێ ته‌ڤلی په‌كه‌كێ دبن، لێ پاش ته‌ڤلیبوونا وان ژ نوو فێم دكن كانێ ئه‌ڤ رێخستن چه‌ند ژ كوردایه‌تیێ و نه‌ته‌وه‌یا كورد و بزاڤا وێ یا رزگاریخوازی دووره‌، ژ نوو فێم دكن كو ئه‌ڤ رێخستن بوویه‌ ئاسته‌نگا هه‌ری مه‌زن د رێیا سه‌رخوه‌بوونا كوردستانێ ده‌ و ب چ ئاوا كه‌تییه‌ د خزمه‌تا پیلانێن داگیركه‌رێن كوردستانێ دا‌.