قایمەقامێ ئامێدیێ: 198 گوند ژ بەر پەکەکێ ھاتنە ڤالا کرن

قایمەقامێ ئامێدیێ: 198 گوند ژ بەر پەکەکێ ھاتنە ڤالا کرن

قایمەقامێ ئامێدیێ ئیسماعیل مستەفا گۆت کو ژ بەر ھەبوونا چەکدارێن ریخستنا پەکەکێ ل ھەرێمێ 198 گوندێن ناڤچەیا ئامێدیێ ھاتنە ڤالا کرن.

قایمەقامێ ئامێدییێ، ئیسماعیل مستەفا، ژ بۆ پێگەها باس نیۆزێ ئاخڤی و دیار کر کو ژ 348 گوندێن دکەڤنە دەڤەرا ئامێدیێ 198 گوند ب سەدەما هەبوونا چەکدارێن رێخستنا پەکەکێ ھاتنە ڤالا کرن، و گوندی نەچار مانە کۆچی ناڤچە و ناڤەندا باژێری بکن.

ئیسماعیل مستەفا دەستنیشان کر کو ژ بەر ھەلوەستا ھێزێن چەکدارێن پەکەکێ و بۆمبەبارانێن بەردەوام یێن بالەفرێن دەولەتا ترکیێ ل نێزی وارگەھان، زەڤیێن چاندنی و باخچەیێن گەلێ ناڤچەیێ زییان دیتنە.

ئیسمایل مستەفا گۆتنێن خوە ب ڤی رەنگی بەردەوام کرن: “سەدەما ڤان بۆمبەباران و کۆچبەر بوون و زییانێن گەل ھەبوونا پەکەکێ یە. ئەو گەلەک نێزیکێ گوندانن و ل هندەک دەڤەران کەتنە ناڤا گوندان دا. ئەڤ رەوش ژ بۆ سڤیلێن ل ھەرێمێ دژین مەترسیەک مەزن چێدکەت. “

دیار کر کو گوندی ژ ترسا بۆمبەبارانێ و پەکەکێ نکارن بچن گوندێن خوە، ئیسماعیل مستەفا گۆت، “ل ھندەک گوندان تەنێ یەک-دو خانی مانە. گوندێن دی ھەمی ڤالا نە ”.

قایمەقامی ئامێدیێ دەستنیشان کر کو گوندێن ل ھەرێمێن بەرواری بالا، بامەرنێ، وەرمێلێ و بابیرێ ژ بەر پەڤچوونێن د ناڤبەرا ئارتێشا ترک و پەکەکێ دا ب مەھان بەری نها ڤالا بوونە.