پارتییا كاركه‌رێن كوردستانێ ل سه‌ر ره‌ڤاندنا كچ و سنێله‌یێن كورد به‌رده‌وامه و داوی جار، كچه‌كا 19 سال ژ كه‌مپا مه‌خموورێ ب دارێ زۆرێ كێشی قه‌ندیلی كر و مالباتا وێ كچێ گه‌ف ل په‌كه‌كێ كرینه كو گه‌ر كچا وان نه‌هێته ڤه‌گه‌راندن دێ تۆلا وێ ڤه‌كه‌ن.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، ل رۆژا 14 ڤێ مه‌هێ، كچه‌كا 19 سال یا ب ناڤێ «چیمه‌ن به‌حری سه‌یدۆ» ب ناسناڤێ «ئالتورك» كو یه‌ك ژ ئاكنجیێن كه‌مپا مه‌خموورێ یه و ژ عه‌شیرا گۆیی یانه، ب دارێ زۆرێ ژ بال رێكخستنێن گه‌نجێن كه‌مپا مه‌خموورێ یا گرێدای په‌كه‌كێ هاتییه ره‌ڤاندن و برینه قه‌ندیلی.
ده‌ست نیشان كر، ئه‌ڤ كچه ب به‌هانه‌یا به‌شداری كرنێ د خوله‌كا په‌روه‌رده‌كرنێ دا یا په‌كه‌كێ ژ بۆ قه‌ندیلی هاتییه ره‌ڤاندن، ڤێ یه‌كێ كێشه ل نێڤبه‌را مالباتا چیمه‌نێ و رێكخستنێن گه‌نجێن كه‌مپێ دا چێكرینه.
ل گۆر ئاگاهیێن كو چاڤكانیێن پێگه‌ها مه ژ كه‌مپا مه‌خموورێ ب ده‌ست ئێخستین، ل رۆژا 15 ڤێ مه‌هێ مامێ چیمه‌نێ كو ناڤێ وی «ئه‌رداله» ب چه‌كێ كلاشینكۆفێ گوللـه به‌رداینه باره‌گه‌هێ رێكخستنێن گه‌نجێن كه‌مپا مه‌خموورێ، پشتره ئاساییشا كه‌مپێ ئه‌و ده‌سته‌سه‌ر كرییه.
مالباتا «چیمه‌نێ» پاش ره‌ڤاندنا كچا وان، گه‌ف ل په‌كه‌كێ كرینه و ژێره گۆتینه هه‌گه‌ر كچا وان «چیمه‌ن» نه‌هێته ڤه‌گه‌راندن دێ كێشه‌یه‌كا مه‌زن دروست كه‌ن.
