19 چەکدارێن سەر ب ئیرانێ ل سووریێ هاتنە کوشتن

19 چەکدارێن سەر ب ئیرانێ ل سووریێ هاتنە کوشتن

ئیرۆ رۆژا پێنجشەمبی ب سەدەما بۆمبەبارانکرنا بارەگەهێن هێزێن چەکدار یێن سەر ب ئیرانێ ڤە، ل رۆژهلاتێ سووریێ، هەری کێم 19 چەکدار و لایەنگرێن ئیرانێ هاتنە کوشتن.

رەوانگەها سووریێ ژ بۆ مافێن مرۆڤان، کو بارەگەها وێ یا سەرەکی ل بەریتانیایێ یە، راگەهاند، گومان دهێتە کرن بالەفرەکا ئیسرائیلی ل نێزیکی باژێرێ ئەلبووکەمال یێ هەڤسنۆرێ سووریێ و ئیراقێ بۆردۆمان کربیت.

د داخویانیا ڤێ سازیێ دا هاتیە: دهێتە تەخمین کرن هەموو کەسێن هاتیە کوشتن ب ئەسلێ خوە “پاکستانی” بن.

ئەڤە یەکەمین جار نینە ئەڤ گرووپ و میلیشیایێن چەکدار ل سەر سنۆرێ دێرازۆرێ دهێنە بۆمبەبارانکرن، شەڤا شەمبی یا رابووری ژی، د ئەنجاما بۆمبەبارانکرنەکێ دا 14 چەکدارێن سەر ب ئیرانێ هاتبوونە کوشتن.