كازمی ب كوشتنا خوه‌پێشانده‌ران تێ به‌رپرسیار كرن

كازمی ب كوشتنا خوه‌پێشانده‌ران تێ به‌رپرسیار كرن

نه‌رینگه‌ها ئیراقی یا مافێن مرۆڤان، مسته‌فا كازمی یێ سه‌رۆك وه‌زیر ب كوشتنا خوه‌پێشانده‌ران به‌رپرسیار كر و ئه‌شكه‌ره‌ كر، چێكرنا كۆمیتێن لێكۆلینێ چ گرنگییه‌ك نینه‌.

نه‌رینگه‌ها ئیراقی یا مافێن مرۆڤان ئه‌ڤرۆ رۆژا شه‌مبی 28/11/2020ێ، د داخویانییه‌كێ ده‌ست نیشان كر، پێویسته‌ مسته‌فا كازمی سه‌رۆك وه‌زیرێ ئیراقێ ته‌نێ ل هه‌نگاڤا چێكرنا لژنه‌یێن لێكۆلینێ ل ده‌ربارێ كوشتنا خوه‌پێشانده‌ران نه‌راوه‌ستیت و ژ به‌ر كو كازمی فه‌رماندارێ گشتی یێ هێزێن چه‌كداره‌، ته‌نێ ئه‌و ب به‌رپرسیار ل سه‌ر ڤێ جینایه‌تێ دهێته‌ هه‌ژمارتن.

هه‌روه‌ها ئاماژه‌ كر، ئه‌ركێ مسته‌فا كازمی پاراستنا جانێ خوه‌پێشانده‌رانه‌ و ژ بوویه‌رێن كو ژ دوهی ڤه‌ ل مه‌یدانێن خوه‌پێشانده‌ران چێبوونه‌، ئه‌شكه‌ره‌ دبیت كو حكوومه‌تا ئیراقێ شیان نینن جانێ وه‌لاتییان بپارێزیت.

تێ زانین ژ دوهی رۆژا ئینی خوه‌پێشاندانێن مه‌زن ل باژارێ ناسریێ یێ پایته‌ختا پارێزگه‌ها زیقارێ چێبووینه‌، د ئه‌نجامێ دا‌ 6 خوه‌پێشانده‌ر هاتنه‌ كوشتن پتری 50 خوه‌پێشانده‌رێن دی بریندار بووینه‌.

ئێریشا چه‌كدارێن نه‌ناسكری ب ئه‌گه‌را كوشتنا ڤان خوه‌پێشانده‌ران دهێته‌ هه‌ژمارتن.