ته‌رمێ سیاسه‌تمه‌دار «حه‌میدێ سماییل ئاغا» ل مێردینێ هات ڤه‌شارتن

ته‌رمێ سیاسه‌تمه‌دار «حه‌میدێ سماییل ئاغا» ل مێردینێ هات ڤه‌شارتن

مه‌راسیما بن ئاخ كرنا، تەرمێ حه‌مید کلنچ ئاسلان «حه‌میدێ سمایل ئاغا»، سیاسەتمەدار و بەردەڤکێ په‌ده‌كا – باکور، ئیرۆ ل پارێزگه‌ها مێردینێ یا باكورێ كوردستانێ برێڤه‌چوون.

ته‌رمێ حه‌میدێ سماییل ئاغا ئیرۆ رۆژا شه‌مبی، ژ ئەنقەرێ ھات ڤەگەراندن و ژ بۆی گوندێ وی سماییل ئاغایێ قۆسەرا یا سەر ب مێردینێ ڤە ھات ڤەگوھاستن  و ل وێرێ ب بەشداربوونا ھەژمارەکا کەسایەتی و سیاسەتمەدارێن باکورێ کوردستانێ ل گۆرستانا گوندی سپارتن ئاخێ.

حه‌میدێ سماییل ئاغا بەریا پێتری مه‌هه‌كێ ب ڤیرۆسا كۆرۆنایێ کەتبوو و ژ بەر رەوشا وی یا خەراب، ئەو ژ بۆ نەخوەشخانەیا ئەنقەرێ ھاتبوو ڤەگوھاستن.

پشتی وەرگرتنا چارەسەریێ بۆ دەما ٢٧ رۆژان ل نەخوەشخانەیێ مایی، ژ بەر تێکچوونا رەوشا وی، وی سیاسەتمەدارێ کورد دوھ رۆژا ئینی کۆچا داوی کربوو.

حه‌میدێ سماییل ئاغا کی یە؟

  • ل سالا 1948ێ دا ل گوندێ سماییل ئاغا یێ مێردینێ ژ دایكبوویه‌.

  • ل داوییا سالێن ٦٠ێ به‌شا یاسایێ ل ئه‌نقه‌ره‌یێ خوه‌ند.

  • ژ بەر کاروبارێن سیاسی و ئەندامه‌تییا پارتییا دەمۆکراتیک یا باكورێ كوردستانێ، ئه‌و ژ زانینگەھا ھاتە ده‌رێخستن.

  • ل سالا 1979ێ دا ب ئاوایەکێ چالاکتر ل باکورێ کوردستانێ کەتە د ناڤا تەڤگەرا په‌ده‌كێ دا.

  • د دەما كۆده‌تایا 12 ئیلۆنێ یا 1980ێ نەچار ما دەرباسی رۆژئاڤایێ کوردستانێ ببیت.

  • ژ وێ دەرێ ژی و ل سالا 1983ێ دا دەرباسی سوێدێ بوو.

  • ل سالا 2017ێ دا پشتی کۆنگرەیا 12ێ یا په‌ده‌كا باكور ل ئامەدێ، وەک بەردەڤکێ ڤێ پارتیێ ھاتبوو دیارکرن.