ھەڤسەرۆکێ بەرێ یێ پارتییا ده‌مۆكراتیك یا گه‌لان هه‌ده‌پێ راگه‌ھاند، ئەگەر ترکیە دەولەتا کوردانە ژی، دڤێ ئاستەنگیێن ل پێشییا زمانێ کوردی بهێنه راکرن، هه‌روه‌ها ده‌ست نیشان كر كو ئه‌و نه یێكه ژ ئه‌ندام یان رێڤه‌به‌رێن په‌كه‌كێ.
سه‌لاحه‌ددین دەمیرتاش ل گرتیگەھێ بەرسڤا پرسیارێن 45 کەسایەتی، رۆژنامەڤان و نڤیسکارێن کورد و ترک دا.
دەمیرتاش ل سەر پرسا جڤاکناس ئیسماییل بەشێکچی یا د دەربارێ زمانێ کوردی دا و پاشگوھخستنا وێ ژ ئالیێ بەرپرسێن کوردی ڤە وه‌ھا گۆت: «هێژان ژ بۆ چارەسەر کرنا ڤێ مژارێ دەم ھەیە، دڤێ ژ بۆ پاراستنێ، زمان بهێته بكارئانین، ئەگەر ترکیە دەولەتا کوردانە ژی، دڤێت ئاستەنگیێن ل پێشیا زمانێ کوردی بهێنه راکرن و ببیته ئالیكار».
دەمیرتاش ل سەر تۆمەتبار کرنا وی ب ئەندامتییا په‌كه‌كێ ژی ئاخڤی و دیار کر کو چ په‌یوەندییا وی ب په‌كه‌كێ ڤە نینە و وه‌ھا گۆت: «ئەگەر ئەز ئەندام ئان ژی رێڤەبەرێ په‌كه‌كێ بام، من ئەڤ یەک ژ دادگەھێ ڤەنەدشارت، تشتەکی منێ بێ ڤەشارتن نینە«.
دەمیرتاش تەکەز کر ژی کو ژ بلی هه‌ده‌پێ، ئەو نە گرێدایی چ پارتی و ئالییەکێ دی یه.
ھەڤسەرۆکێ ھدپێ یێ بەرێ سه‌لاحه‌ددین ده‌میرتاش ژ 4ێ مژدارا سالا 2016ێ ڤە ب چەندین تۆھمەتێن جودا ل ئەدیرنە یێ زیندان کرییە.
