ئیرۆ رۆژا دوشه‌میێ د مه‌راسیمه‌كه مه‌زن ده، ئیرانێ ته‌رمێ زانایێ ئه‌تۆمی محسن فه‌خریزاده ل گۆرستانا ته‌هرانێ سپارت ئاخێ.
ئیرۆ رۆژا دوشه‌می 30/11/2020ان ل ته‌هرانێ یا پایته‌ختا ئیرانێ، مه‌راسیما بن ئاخ كرنا زانایێ ئه‌تۆمی یێ محسن فه‌خریزاده برێڤه‌چوو، هه‌ژماره‌كه هه‌ری زۆر ئا به‌رپرسێن ئیرانێ به‌شداری مه‌راسیمێ كرن ژ وان، وه‌زیرێ به‌رگریێ، سه‌رۆكێ رێخستنا تێهنا ئه‌تۆمی، فه‌رماندارێ سپایێ پاسداران و فه‌رماندارێ فه‌یله‌قا قودسێ.
پاش كو نمێژا مرییا ل سه‌ر جه‌سه‌دێ فه‌خریزاده هاتییه كرن، ئه‌و ل قادا گۆرستانا ئیمامزاده سالح ل ته‌هرانێ ب ئاخێ هات سپارتن.
د مه‌راسیمێ ده، ئه‌میر حاته‌می وه‌زیرێ به‌رگرییا ئیرانێ داخویانی دا و ده‌ست نیشان كر كو ته‌رۆر كرنا فه‌خریزاده بێ به‌رسڤ نابه و ژ بۆ ڤێ مه‌به‌سێ فه‌رمان ژ بال رابه‌رێ ئیرانێ ئایه‌توللا عه‌لی خامنه‌یی هاتییه ده‌ر كرن.
تێ زانین زانایێ ئه‌تۆمی یێ ئیرانێ محسن فه‌خریزاده ل ئینییا رابووری د ئێریشه‌كێ ده ل ناڤه‌ندا ته‌هرانێ هات هه‌ده‌ف كرن، ئیرانێ هه‌ر راست ئیسرائیل ب ته‌رۆر كرنێ سووچبار كرییه و گه‌فا تۆلهلدانێ لێ كرییه.
