ژێدەرەکێ ژ ئەولەھیا ئیراقێ راگەھاند، چەکدارێن پارتیا کارکەرێن کوردستانێ (پەکەکێ) 7 بارەگەھێن خوە ل شنگالێ ڤالا کرن. ئەو ژی د چارچۆڤەیا رێکەفتنا ئاساییکرنا رەوشا شنگالێ دایە.
حکوومەتا ھەرێما کوردستانێ و حکوومەتا فیدەرال یا ئیراقێ ل سەر رەوشا ئاساییکرنا شنگالێ رێکەفتبوون. ل گۆر رێکەفتنێ ژی، دڤێت ھێزێن چەکدار ل ناڤچەیێ نەمینن، دا کو زەمینەیەکا گونجاو ژ بۆ ڤەگەراندنا پەنابەران پەیدا بکەن.
حەتا نھا گەلەک کۆچبەرێن شنگالێ ژ بەر ھەبوونا پەکەکێ و گەلەک گرووپ و رێخستنێن دی یێن چەکدار ڤەنەگەریانە دەڤەرێن خوە. کۆچبەرێن شنگالێ ب خوە بەحسا وێ یەکێ دکەن کو ژ بلی کو خزمەتگوزاریێن پێویست ل ناڤچەیێن وان نینن، ژ بەر ھەبوونا وان گرووپان ئەو ھەست ب ئارامیێ ناکەن.
رۆژا 27/11/2020ێ ئالایێ گرووپێن چەکدارا ل ناڤا شنگالێ ھاتنە داخستن کو ل گۆری رێکەفتنا د ناڤبەرا ھەولێر و بەغدایێ دا دڤێت، گرووپێن چەکداران 5 کیلۆمەتران دووری شەنگالێ بن.
