وەزیرێ پەروەردا سووریێ دارم تەبا ل پەرلەمانێ سووریێ گۆتارەک پێشکەش کر و تێدا ئاشکەرا کر، ئەو دێ هەموو قۆتابخانەیان ژ دەستێ رێڤەبەریا خوەسەر دەرخن و زمانێ کوردی لێ بدەنە خواندن.
وەزیرێ پەروەردا سووریێ دارم تەبا راگەھاند، خواندن و پەروەردەیا ل قۆتابخانێن کو د دەستێ رێڤەبەریا خوەسەر دا نە، نە پەروەردەیەکا نشتمانی یە و گۆت، حکوومەتا سووریێ کار ل گەل رێخستنێن ناڤدەولەتی دکەت، ژ بۆ کو قۆتابخانەیێن د دەستێ رێڤەبەریا خوەسەر دا، ڤەگەرینن بن کۆنترۆلا حکوومەتا سووریێ.
وەزیرێ پەروەردێ دا زانین: “دێ ل وان قۆتابخانەیان دو دەمژمێران زمانێن کوردی، سوریانی و ئاشووری هێنە خواندن، ئەگەر دایک و بابێن قۆتابییان ڤێ یەکێ داخواز بکەن.”
ھێژایی ب بیرخستنێ یە، ژ سالا 2015ێ ڤە دەستەیا پەروەردە و فێرکرنێ یا رێڤەبەریا خوەسەر پەروەردەیا ب زمانێ کوردی و رێبازا خوە دەرباسی قۆتابخانەیێن پەروەردەیێ کریە و تەنێ پەروەردەیا د بن دەستهەلاتا حکوومەتا سووریێ دا ل چارگۆشەیا ئەولەھیێ یا باژارێ قامشلۆ و حەسەکێ دهێتە دایین.
مژارا پەروەردەیێ د دانووستاندنێن ئەنجوومەنا نشتمانی یا کورد ل سووریێ (ئەنەکەسێ) و پارتیێن یەکیتیا نشتمانی یا کوردی (پەیەنەکێ) دا ژی دهێتە گۆتووبێژکرن کو ئەنەکەسە تەکەز دکەت ئەو نە ل دژی پەروەردەیا ب زمانێ کوردی نە، لە دڤێت گوھەرتن د سیستەما پەروەردێ و رێبازا خواندنێ یا رێڤەبەریا خوەسەر دا چێببن.
