پارتییا كاركه‌رێن كوردستانێ هه‌ركو دچه كریارێن وێ یێن ب ته‌رزێ ته‌رۆرێ باشتر و زه‌لالتر ئه‌شكه‌ره دبن، ل مه‌ها رابووری ڤێ رێخستنێ ل 3 ناڤچه‌یێن جودا یێن باشوورێ وه‌لات TNT ل سه‌ر جاده‌یێن سه‌ره‌كه ته‌قاندنه، یه‌ك ژێ ل نێزی شركه‌ته‌كه په‌ترۆلێ بوو.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، د مه‌ها رابووری ده، په‌كه‌كێ 3 جاران TNT ل باشوور ته‌قاندنه ب تایبه‌ت ل ناڤچه‌یێن كو ڤێ رێخستنێ ژ نوو ڤه داگیر كرنه.
ئه‌شكه‌ره كر، په‌كه‌كێ ئه‌ڤ TNT ل رۆژێن 3 و 8 و 11 مه‌ها رابووری ل ناڤچه‌یێن ده‌ركارێ، سۆران و چه‌مانكێ ته‌قاندنه و ب ڤی ئاوایی:
ل رۆژا 3/11/2020ان، پەکەکێ بۆمبەیەک چاندی ل سەر رێیا پاسەوانێن سینۆر یێن ئیراقێ کو کوردن دانابوو، بۆمب ل سەر رێیا «پەسارێ بۆسەلێ» یا سەر ب دەرکارێ ڤە هاتبوو چاندن کو ژ بال وان هێزان ڤە هاتە ژ ناڤ برن.
ل رۆژا 8/11/2020ان دا هەموەلاتییەکی باژارۆکێ سۆران ب ناڤێ «محیه‌ددین هەرکی» کو ب مەرەما ب دەستخستنا دارێن هشک ژ بۆی زڤستانێ چووبوو چیایێ «بۆلێ» کو دکەڤە سینۆرێ سیدەکان، مینەک کو ب دەستێ پەکەکێ هاتبوو چاندن ب وی دا تەقیایە.
ل رۆژا 1/11/2020ێ ل نێزی ده‌مژمێر 5 سه‌رێ سبێ، چه‌كدارێن په‌كه‌كێ دوو TNT ل سه‌ر جادا سه‌ره‌كه یا د نێڤبه‌را گوندێن «بێبادێ و كانیكا» ل ناڤچه‌یا چه‌مانكێ ته‌قاندن، ئه‌ڤ ته‌قین ب دووراتییا 630م ژ شركه‌تا په‌ترۆلێ بوو.
چاڤكانیێن پێگه‌ها داركا مازی ئه‌شكه‌ره كر، هه‌ر چه‌ند كو ل وێ ده‌مێ چ حه‌ره‌كه‌تا ئۆتۆمبێلان ل ور نه‌بوو، لێ به‌لێ په‌كه‌كێ ئه‌ڤ ته‌قین ئه‌نجام دا ب مه‌به‌ستا چێكرنا ره‌وشه‌كه نه‌ئارام ل ناڤچه‌یێ كو شركه‌تیێن بیانی یێن ده‌رخستنا په‌ترۆلێ لێ نه، ئه‌ڤ ژی ب وێ واتایێ تێ كو په‌كه‌كه ل سه‌ر هه‌ده‌ف كرنا پێگه‌ها ئابووری یا باشوورێ كوردستانێ به‌رده‌وامه ب تایبه‌ت پاش كو بوورییا په‌ترۆلا كوردستانێ د كریاره‌كه ته‌رۆری ده ته‌قاندی.
