ئەندامێ کۆمیتەیا دەرڤە یا ئەنجوومەنا نشتیمانی یا کورد ل سووریێ (ئەنەکەس)ێ ئیبراھیم برۆ ل سەر داخویانیا ئەنداما سەرۆکاتیا پەیەدێ فۆزا یووسف یا دەربارێ راوەستاندنا دانووستاندنێن کوردی-کوردی دا گۆت: “ھەر جارا ئەنەکەسە ساردانا ترکیا یان ئیتیلافێ بکەت، پەیەدە وێ ب خیانەت ب ناڤ دکەن. لێ د ھەمان دەم دا ژی ئەو ب خوە دبێژن ئەم ئامادەینە بێ شەرت و مەرج د گەل ئیتیلافێ و ترکیێ روونین.”
ئەنداما دەستەیا سەرۆکاتیا پارتیا یەکیتیا دەمۆکراتیک (پەیەدێ) فۆزا یووسف د ھەڤپەیڤینەکێ دا ل گەل مەدیایا پەکەکێ گۆتبوو: “دانووستاندنێن یەکرێزیا ئالیێن کوردی ل رۆژاڤایێ کوردستانێ گەھیشتیە ریەکا گرتی. ئەنەکەسە رۆژ ب رۆژ مەرجێن نوویێن زەحمەت پێشکێش دکەت و داخوازا ھەڤپاریا نیڤ ب نیڤ د رێڤەبەریا خوەسەر دا دکەت.”
ئیبراھیم برۆ ل سەر ڤێ مژارێ ژ بۆ کوردستان24 ێ راگەھاند، “نە جارا ئەولی یە کو سەرکردەیێن پەیەدێ داخویانیێ وھا ل سەر ئەنەکەسێ ددەن. ژ دەستپێکێ ڤە د بن چاڤدێریا ئەمریکا دا ھن پرەنسیپ ژ بۆ دیالۆگا کوردی ھاتن دانین. دانووستاندن دێ د ناڤبەرا دو ئالیان دە بە، ژ بۆ بگھن ھەڤپاریەکە راستەقینە. ئەو تۆمەتێن کو نھا ئەنەکەسێ پێ تۆمەتبار دکەن، ئێدی ناهێن قەبوولکرن.”
برۆ گۆت: “ئەنەکەسە دەما داخوازا هەڤبەشیەکا راستەقینە دکەت نە کۆمپانیایەکێ پارڤە دکەت، بەلکوو ئەم دخوازین خزمەتا ملەتێ خوە بکەین. رێڤەبەریا خوەسەر یا ھەیی، چەند سالن تشتەک ل رۆژئاڤایێ کوردستانێ نەهێلا، ھەر تشت وێران کر و ب رێکارێن ئەولەکاریێ و گەفێن لەشکەری خەلک برسی و کۆچبەر کر. ڤێ رێڤەبەریێ حەتا نھا تشتەک ژ حکوومەتا سووریێ ژ بۆ مافێ گەلێ کورد نەکریە.”
ئەندامێ کۆمیتەیا دەرڤە یا ئەنەکەسێ دیار کر: “کارێ کو پەکەکێ ل ھەرێما کوردستانێ و شنگالێ دکر، کارتێکرنەکا گەلەک خراب ل رۆلا پەیەدێ کر د ناڤخوەیێ کوردستانا سووریێ دا کو ئێدی گەفان ل خەلکێ و خوەدیێ پێشمەرگەیان دکەن و دبێژن ئەم دێ وە ژ وەلات دەربکەین.”
ئیبراھیم برۆ دەستنیشان کر: “د دەما کو دانووستاندن چێدبن و گاڤێن باش تێن ئاڤێتن و ھێڤیێن ملەتی چێدبن کو ئارامی و ئاشتی ل وەلاتێ مە چێببیت و ڤی وەلاتی ئاڤا بکەن، ئەو ب داخویانیێن ب ڤی رەنگی دخوازن ھەر تشتی وێران بکەن و تشتەکێ نەھێلن کو دانووستاندن ل سەر بهێتە کرن.”
برۆ دا زانین: “ئەم وەک ئەنەکەسە، دێ د وان دانووستاندنان دا بەردەوام بین، لێ دڤێت ئالیێ دی رێزێ ل دانووستاندنێ بگریت و ئەو کەسێن کو داخویانیان ل دژی ئەنەکەسێ ددەن، لێپرسین دگەل بهێتە کرن.”
د بەردەوامێ دە ئیبراھیم برۆ ببیر خست: “ھەر جارا ئەنەکسە سەرەدانا ترکیا، یان ئیتیلافا ئۆپۆزیسیۆنێ بکەت، وێ ب خیانەتێ ب ناڤ دکەن. لێ د ھەمان دەمێ دا ژی ئەو ب خوە دبێژن ئەم ئامادەینە بێ شەرت و مەرج دگەل ئیتیلافێ و ترکیێ روونین. ئێدی ئەڤ تومەتبارکرنا ئەنەکەسێ ناهێن قەبوولکرن.”
ل پرسا پاڤەکرنا رێڤەبەریا نیڤ ب نیڤ ژی برۆ گۆت: “ئەز تەکەز دکەم و بەلگە ھەنە کو د دەستپێکا دیالۆگێ دا ئەم هەردو ئالی وەک دو هەڤبەشێن راستەقینە، ل سەر بنگەھێ رێکەفتنا دوھۆکێ، دێ هەڤبەشیا د رێڤەبەریێ دا د ھەموو وارێن وێ یێن سیاسی، ئیداری و لەشکەری، ئەولەھی و ئابۆری دا کەین. ئەم دکارین ڤان بەلگەیان نیشانی خەلکێ خوە بدەین.”
برۆ د داویێ دا ب ڤی رەنگی ئاخڤت: “ئەم دێ دگەل ھەموو ئالیێن پەیوەندیان گرێدەین، تا کو ئەڤ دیالۆگ و دانووستاندنە بکەڤیتە سەر رێیا خوەیا ئاسایی، وەکو د دەستپێکێ دا ھاتیە کو ل سەر بنگەھا رێکەفتنا دوھۆکێ بیت و ئەو خالێن باوەریێ یێن حەتا نھا ب جھ نەھاتی، بهێنە بجھکرن. ژ بەر کو ئەنەکەسێ گەلەک دەرفەت دا کو ئەڤ دانووستاندنە سەربکەڤن و حەتا نھا ژی ئەم وێ دەرفەتێ ددەین.”
