ل تركیه‌یێ و باكورێ كوردستانێ، پارتییه‌كا نوو هات دامه‌زراندن كو ناڤێ كورد تێدایه، ئارمانجا ڤێ پارتیێ هشیار كرنا گه‌نجێن كورده ل سه‌ر پرسێن نه‌ته‌وه‌یی.
تێ پشبینی كرن ل رۆژا 12 ڤێ مه‌هێ، پارتییا ده‌مۆكراتا كورد دامه‌زراندنا خوه ل تركیه‌یێ و باكورێ كوردستانێ راگه‌هینیت.
پارتییا دەمۆکراتا کورد، دخوازیت ب پرانی گه‌نجێن کورد ب رێكبێخیت و ھشمەندییا نەتەوەیی د ناڤا جوانێن کورد دا بەلاڤ بکەت.
سەرۆکێ پارتییا دەمۆکراتا کورد رەشید ئاکنج راگھاند ئەو دخوازیت میراتا نەتەوەیی یا کو دەمەکێ ل باکورێ کوردستانێ گەلەک خورت بوو جارەکا دی زندی بکەت و ل میراتا نفشێن بەرێ خوەدی ده‌ركه‌ڤیت.
رەشید ژ بۆ كه‌نالا كوردستان 24ێ ئاخڤی و وه‌ها گۆت:«کەسایەتێن کو ژ سالا 1965ێ ڤە ل سەر رێبازا پارتیێ نەتەوەپەروەریێ دکه‌ن یەک ب یەک ژ ناڤ مە بار دکه‌ن، ئەم دخوازین ل میراتا وان کەسان خوەدی دەربکەڤین، کەسێن وەک حەمید کلچاسلان، مەلە عیمادەدین، دەروێشێ سەدۆ دچن لێ جهێ وان پر نابیت، ئەم دێ ل میراتا وان ب گه‌نجان خوەدی دەرکەڤین.«
پارتییا نوو یا کو دخوازیت گه‌نجێن کوردان ل ھەڤ بجڤینە ئاماژە دکەت کو پارتیێن کوردستانی و پارتیێن کو د ناڤێ وان دا پەیڤا کورد ھەنە، لێ کێماسییا ھەری مەزن یا پارتیێن کوردان ئەوە کو گه‌نج تێدا کێمن.
رەشید ئاکنج دیار کر، رۆژا کو ئەم راگه‌ھینین کو ئەم دێ دەست ب کارێ خوە كه‌ین، وێ دەمێ دێ دیار بیت کانێ چقاس گه‌نج ل دۆرا مە نە، دروشما مە ئەوە کو ئەم دبێژن مە خاکا چ کەسێ داگیر نەکرییە و ئەم ل سەر خاکا کوردستانێ ژی داگیرکەران ناخوازین.
سەرۆکێ پارتییا دەمۆکراتا کورد رەشید ئاکنج ئامادەکارییان دکەت کو د 12 ڤێ مەھێ دا ل گەل دامەزرێنەرێن پارتیێ ب جڤینەکا چاپەمەنیێ دامەزراندنا پارتیێ ژ رایا گشتی را راگھینیت، ھەروه‌ھا ھەتا نھا تایێن پارتیێ یێن وان، ل دێرسمێ و سەمسوورێ ژی د ئاستا ئاڤاکرنێ دا نە.
