بارەگەهێن په‌كه‌كێ‌ ل ئامێدیێ هاتنە بۆمبەباران کرن

باله‌فرێن ده‌وله‌تا تركیێ ئیرۆ بارەگەهێن چه‌كدارێن په‌كه‌كێ ل باشوورێ كوردستانێ، بۆمبەباران كرن‌.

یەک ژ خەلکێ ناڤچەیا ئامێدیێ کو نەخواست ناڤێ وی بهێتە ئاشکەرا کرن ژ پێگه‌ها داركا مازی را راگەهاند، ئیرۆ رۆژا شەمبی 5/12/2020ان، باله‌فرێن جه‌نگی یێن ده‌وله‌تا تركیێ ئێریشی بارەگەهێن په‌كه‌كێ ل چیایێ گارە کر.

ده‌ست نیشان كر، ئێریش ل ده‌مژمێر 4:50 خوله‌كێ پاش نیڤرۆژێ چێبوویه‌، باله‌فران د ئێریشێ دا‌، دو مووشه‌ك ل ئاقارێ گوندێ گرگاش خستنە، ئه‌ڤ گوندە دکەڤیتە چیایێ گاره‌ ل رۆژهلاتێ باژارێ ئامێدیێ، ب دووراتییا 10 کیلۆمەتران.

هه‌ر چه‌ند كو زییانێن ئێریشێ نه‌هاتنه‌ زانین، لێ به‌لێ ل گۆر دیمه‌نێن كو ژ بۆ پێگه‌ها مه‌ هاتینە شاندن دیار دبیت، دۆمانه‌كا‌ مه‌زن ل جیێ كه‌تنا مووشه‌كا بلند بوویە.

هەر وەها ئاشکەرا کر، ئەڤە نە جارا یەکەمینە ئەڤ گوندە ب سەدەما هەبوونا چەکدارێن پەکەکێ دهێتە بۆمبەبارانکرن، بەلکو ئەڤە چەندین جارن ئەڤ گوندە دهێتە بۆمبەباران کرن، ب ئاوایەکێ کو خەلکێ گوندی ئێدی نکارن ژیانا خوە ب ئارامی ببوورینن.