یه‌به‌شه میلیشیایا لیوایا «فه‌تح ئه‌لمومبین» یا حه‌شدا شه‌عبی یه
پرسا ده‌ركه‌تنا په‌كه‌كێ و میلیشیایێن گرێدای وێ ژ شه‌نگالێ هێژان نه‌زه‌لاله، قائیمقامێ شه‌نگالێ دبێژه: «هێزێن گرێدای په‌كه‌كێ ژ شه‌نگالێ ده‌رنه‌كه‌تنه، لێ به‌لێ ته‌نێ جیێ باره‌گه‌هێن خوه گوهه‌راندنه».
رۆژنامه‌یا «شه‌رقولئه‌وسه‌ت» د هه‌ژمارا خوه یا ئیرۆ رۆژا یه‌كشه‌می 6/12/2020ان ده، راپۆره‌ك ل ده‌ربارا په‌یمانا شه‌نگالێ و ده‌ركه‌تنا هێزێن گرێدای په‌كه‌كێ به‌لاڤ كرییه و تێده هنه‌ك ئاگاهی ل ده‌ربارا ڤێ مه‌سه‌لێ ئه‌شكه‌ره كرنه.
مه‌حما خه‌لیل، قائیمقامێ شه‌نگالێ ژ بۆ ڤێ رۆژنامێ وها ئاخڤی یه: «پێڤاژۆیا جی ب جی كرنا په‌یمانا شه‌نگالێ شه‌كلی یه و تو راستی ژ بۆ نینه، ژ به‌ر كو یه‌كینه‌یێن پاراستنا شه‌نگالێ یه‌به‌شه، ژ شه‌نگالێ ده‌رنه‌كه‌تنه و ته‌نێ جیێ وان هاتییه ڤه‌گوهه‌ستن».
هه‌روه‌ها ده‌ست نیشان كر، هه‌ر چه‌ند كو ل گۆری په‌یمانا هه‌ولێر و به‌غدایێ، پێویسته یه‌به‌شه و په‌كه‌كه ژ ته‌ماما جوگرافیایا شه‌نگالێ وه‌رن ده‌رخستن، لێ بلێ تشتا چێبووی ئه‌ڤه كو باره‌گه‌هێن یه‌به‌شێ ژ ناڤه‌ندا باژێر ژ بۆ چیایێ شه‌نگالێ تێن ڤه‌گوهه‌ستن، هه‌م ده‌م به‌شه‌ك ژ وان ته‌ڤلی حه‌شدا شه‌عبی بوونه.
د ڤێ ده‌ربارێ ده، داوود جوندی، ئه‌ندامێ ئه‌نجوومه‌نا پارێزگه‌هییا نه‌ینه‌وایێ یێ شه‌نگالێ، ژ بۆ رۆژنامه‌یا «شه‌رقولئه‌وسه‌ت» گۆتییه: «په‌یمانا شه‌نگالێ ب باشی تێ جی ب جی كرن، پۆلیسێن فه‌ده‌رال جیێ یه‌به‌شێ گرتنه، ل گور په‌یمانێ پێویسته یه‌به‌شه ل ناڤه‌ندا باژێر نه‌مینه، لێ د راستی ده، ئه‌و به‌شه‌كن ژ حه‌شدا شه‌عبی و تو كه‌س و ئالییان ماف نینه داخوازا ده‌رخستنا وان ژ ته‌ڤایا جوگرافیایا شه‌نگالێ بكن».
چاڤكانییه‌كێ به‌رپرس ژ شه‌نگالێ كو نه‌خوه‌ستییه ناڤێ وی وه‌ره ئه‌شكه‌ره كرن ژ بۆ رۆژنامه‌یا «شه‌رقولئه‌وسه‌ت» ئاخڤی یه و گۆتییه: «یه‌به‌شه یا گرێدای په‌كه‌كێ، نها ب فه‌رمی به‌شه‌كه ژ حه‌شدا شه‌عبی د چارچووڤه‌یا لیوایا »فه‌تح ئه‌لموبین« دا، ئه‌ڤ هێز ژ سالا 2018ان ڤه، په‌ره‌یێن خوه ژ فه‌رماندارێتییا حه‌شدێ دستینن، لێ به‌لێ پاش ئیمزه كرنا په‌یمانا شه‌نگالێ ل نێڤبه‌را هه‌ولێر و به‌غدایێ، ناڤێ لیوایا «فه‌تح ئه‌لموبین» ژ بۆ لیوایا 80 هاتییه گوهه‌راندن».
ده‌ست نیشان كر، نها هه‌ژمارا چه‌كدارێن یه‌به‌شێ نێزی 3500 چه‌كدارانه و حه‌شدا شه‌عبی وان وه‌كه به‌شه‌كێ رێخستنێن خوه دزانه.
