ل عه‌فرینێ د ئەنجاما شەر و پەڤچوونێن چەکدارێن سەر ب ترکیێ ڤە ل سەر دزی و تالانێ، ژنەک ھاتە کوشتن و 3 زارۆک بریندار بوون.
رێخستنا مافێن مرۆڤان ل عه‌فرینێ بەلاڤ کر، رۆژا 4ێ ڤێ مەھێ د ئەنجاما شەرێ دو گرووپێن چەکدار ل سەر دزی و تالانێ و دەست دانینا سەر مال و ملکێن کوردێن عه‌فرینێ، ل ناڤا باژێر شەرەکی چەکداری د ناڤبەرا وان دە دەرکەت، ھەتا نھا ژی ئالۆزی د ناڤبەرا وان ھەر دو گرووپان دە ل ناڤا باژێر بەردەوامە.
دیار کر ژی، د ئەنجاما وی شەری دە، ژنەکە عەرەب ئا کۆچبەر ھاتە کوشتن و 3 زارۆک ژی بریندار بوون، زارۆکێن بریندار نھا ل نەخوەشخانەیا لەشکەری تێن دەرمان کرن.
وێ رێخستنا مافێن مرۆڤان دیار کر ژی، گرووپا چەکدارا ب ناڤێ ئەل نوخبە ل گوندێ عومه‌ر سمۆ، پشتی کو بەرھەمێن زێدەتر ژ 27 ھەزار دارێن زەیتوونان ژ خوە رە چنین و ھەژمارەکە مەزن ژ داران برین، نھا باجا 2 تەنەکە زەیت ل ھەر مالەکە گوند سەپاندنە.
ژ دەما داگیرکرنا عه‌فرینێ ژ ئالیێ ئارتێشا ترکیێ و گرووپێن چەکدارێن سەر ب وێ ڤە د 18ێ ئادارا 2018ان دە، کوشتن و رەڤاندنا کوردان، دزی، تالان و دەستدانینا سەر مال و ملکێن خەلکێ ژ ئالیێ گرووپێن چەکداران ڤە بەردەوامە.
