سه‌رۆكێ حكوومه‌تا باشوورێ كوردستانێ راگهاند، دوو به‌ره ل باشوورێ كوردستانێ ئاڤابووینه، به‌ره‌یا پارێزه‌رێن كوردستانێ و به‌ره‌یا ناحه‌زان كو دخوازن ئه‌ڤ ستاتۆیه بهێته تێكدان.
سه‌رۆك وه‌زیر مه‌سروور بارزانی، ئیرۆ رۆژا چارشه‌مبیێ 9/12/2020ێ د کۆنفرانسەکێ رۆژنامەڤانی دا بەحسا رەوشا دارایی یا ڤێ داویێ و په‌بوەندیێن د ناڤبەرا ھەولێرێ و به‌غدایێ دا کر، هه‌م ده‌م بوویه‌رێن كو نها ل باشوورێ كوردستانێ دهێنه ژیان كرن.
سەرۆک وەزیر راگھاند، «ئیرۆ ئه‌نجوومه‌نا وه‌زیران كۆمبوو، كۆمبوون ل سەر دوو مژارێن گرنگ بوو، ھەروەھا دانوستاندن ل سەر وان بوویەرێن نەخواستی یێن رۆژێن رابووری رووداین و دانوستاندنێن د ناڤبەرا ھەرێما کوردستانێ و حکوومەتا فەدەرالی ل بەغدایێ ھاتن کرن».
مەسروور بارزانی گۆت: «ب پێ خوەشە بۆ وەلاتییان بەحسا وان راستییان بکه‌ین، ل ده‌ستپێكێ من دڤێت سەرخۆشیێ ل ھەموو کەسوکارێن قوربانیێن کو ژ بەر نەخۆشییا کۆرۆنایێ جانێ خوە ژ دەست داینە بکه‌م».
ھەروه‌ھا گۆت: «ئەم وەک حکوومەتا باشوورێ کوردستانێ، مە ھەر ھەولەک دایە دا کو چارەیەکا گونجای ژ بۆ ئارێشەیێن کو راستی ھەرێما کوردستانێ ھاتین ببینن و ڤێ رەوشا نەلبار سەر راست بکه‌ین، ژ ئالییەکێ دی ڤە، ھەر ھەولەکێ دده‌ین ژ بۆ كو ل گه‌ل حکوومەتا ئیراقێ ل سەر بنگەھێ مافێن دەستووری یێن گەلێ باشوورێ کوردستانێ، بگه‌هینه رێكکەفتنێ».
سەرۆکوەزیر مەسروور بارزانی گۆت: «ئەم ل گەل ھەموو مافێن دەستووری و یاسایی یێن گەلێ کوردستانێ نە، پشتەڤانییا خوەپێشاندانێن ئاسایی، شارستانی و ئاشتیانە یێن گەلێ کوردستانێ دکه‌ین، ئەم دخوازین مرۆڤ ئازاد بیت د دەربرینا بیر و باوەریێن خوە دا، لێ ب رەنگەکی کو ئازادیێ بنپێ نەکەت و مافێن کەسێن دی ئینکار نەکەت».
گۆت ژی: «تشتێ کو مە دیتی، مخابن خەلک د رەوشەکا نەخۆش دا دژین و د نیگه‌رانییا وان دگه‌هین، ب تایبەتی هنده‌ك کەسان خوە ئێخستن د ناڤا خوەپێشاندانان دا و ل شوونا کو ب ئاوایەکی ئاشتییانە پرۆتەستۆ بکه‌ن، توند و تیژی کرن».
مەسروور بارزانی تەکەز کر: ئەم وەکە حکوومەتا ھەرێمێ دەمەکی دا پشتگیرییا خوەپێشاندەران دکه‌ین، لێ د ھەمان دەمی دا ئەرکێ ئارامییا وەلات دپارێزین، ئەز داخوازێ ژ ھەموو خویشک و برایێن خوە دکه‌م، کو د ڤێ ره‌وشا نه‌خواستی یا ب سه‌ر هه‌رێما باشوورێ كوردستانێ دا هاتی تێبگه‌هن».
د به‌شه‌كی دی یێ گۆتنێن خوه دا، مه‌سروور بارزانی ده‌ست نیشان كر كو نها دوو به‌ره ل باشوورێ كوردستانێ ئاڤابووینه، به‌ره‌یا پارێزه‌رێن كوردستانێ و به‌ره‌یێ ناحه‌زان كو دخوازن ئه‌ڤ ستاتۆیه بهێته تێكدان، ئه‌م ب باوه‌رین كو پرانییا گه‌لێ باشوور قوربانی ژ بۆ ئاڤاكرنا ڤێ ئه‌زموونێ داینه، له‌وما د ئاماده نینن ئه‌ڤ ئه‌زموونه ژ ده‌ست بچیت، یان ب هه‌ر به‌هانه‌یه‌كێ بیت ژ بال چ ئالییه‌كی زیان بگه‌هیتێ».
