گرووپا فه‌یله‌قولشام ب ناڤ كوردێن عه‌فرینێ كه‌تنه‌

گرووپ و كۆمێن چه‌كداران یێن گرێدای تركیێ ژ 1ی ڤێ مه‌هێ ڤه‌ 21 شێنی ژ عه‌فرینێ و ناڤچه‌یێن وێ ره‌ڤاندنه‌، ئامانجا كۆمێن چه‌كداران سه‌رخستنا گوهه‌رینا ده‌مۆگرافی ئا ڤێ هه‌رێما رۆژئاڤا كوردستانێ یه‌.

رێخستنا مافێن مرۆڤان ل عه‌فرینێ ئیرۆ رۆژا پێنجشه‌مبی 10/12/2020ێ بەلاڤ کر، چەکدارێن گرووپا فەیلەق ئەلشام، چەند رۆژن ب مالێن وەلاتیێن گوندێن کبێشین، باسووفان و بعیێ یێن ناڤچەیا شێراوا دا گرتنە، ل وەلاتیان دده‌ن و درەڤینن، پێر ژی ل گوندێ کبێشینێ ل ژنەکا 40 سالی دان و رەڤاندن.

ل گۆر زانیاریێن وێ رێخستنا مافێن مرۆڤان، چەند رۆژن چەکداران زێدەتر ژ 15 کەسان ژ وان ھەر سێ گوندان رەڤاندینە، ژ بەر کو چەکداران ئەو گوند دۆرپێچ کرینە، زانیاریێن زێدە ژ وان گوندان ناین بدەستخستن.

رێخستنا مافێن مرۆڤان ل عه‌فرینێ د راپۆرتەکا دی دا بەلاڤ کر، چەکدارێن پۆلیسێن لەشکەری ژ رۆژا 1ێ ڤێ مەھێ ڤە 4 کەس ژ باژارۆکێ جندرێسێ رەڤاندن کو 2 ژ وان ژنن.

ناڤێن کەسێن ھاتینە رەڤاندن وه‌ھا نە: «خالیدا شێخ موراد و کەچا وێ ئەمینە عەبدۆ موراد، محەمەد حاج یووسف و ئەحمەد حاج گولین.«

ھەروھا بەلاڤ کر، گرووپا پۆلیسێن لەشکەری رۆژا 6ێ ڤێ مەھێ 2 کەسێن دی ب ناڤێ «محەمەد حەبەش ھنۆ و محەمەد حسێن دەھدۆ) ژ گوندێ بەھدینا یێ ل ناڤچەیا راجۆ رەڤاندن و نھا چارەنڤیسا وان دیارە».

ژ دەما داگیرکرنا عه‌فرینێ ژ ئالیێ ئارتێشا ترکیێ و گرووپێن چەکدار ڤە ل سالا 2018ێ و ھەتا نھا ب ھەزاران وەلاتیێن سڤیل ھاتنە رەڤاندن و ئەشکەنجەدان، ئارمانجا ترکیێ و گرووپێن چەکدار ژ رەڤاندنا وەلاتییان ئەوە، پرۆسەیا گوھارتنا دەمۆگرافی ب جهـ بینن.