ئەگەر بوویەرەک باش نەهێتە نرخاندن و راستیا بوویەرا ژ بۆ رایا گشتی ب زەلالی نەهێتە ئاشکەراکرن،ھەر دەم راستی وندا دبیت و ئالیێن زانیاریێن شاش بەلاڤ دکەن و ئیستیفزازێ دکەن ب ئاوایەکێ دگەھنە ئارمانجا خوە. ژ خوە ئەڤە سەدەمەکە کو ئالیێن ئاژاوەگێر ل سەر لنگێن خوە دمینن. ژ بۆ وان راستی، درەو نە گرینگە.
د خوەپێشاندانێن د ڤێ قۆناخێ دا ل ھندەک دەڤەرێن باشوورێ کوردستانێ دا چێدبن بەری ھەر تشتەکێ پێدڤییە راستی بهێتە ئاشکەرا کرن. ئەڤ نە خوەپێشاندانێن گەلن نە گەل د قادێن خوەپێشاندانێ دایە. ھندەک ئاژاوەگیرن و تەنێ د بن ھندەک داخوازیێن گەل دا، خوە ڤەدشێرن. د دەستپێکێ دا ئارمانجەکا وان یا سەرەکی ھەیە. ئەو ژی رووخاندنا دەستھلاتداریا یاسایی یا ھەرێما کوردستانێ و تێکبرنا ستاتویا کوردستانێ یە.
گەلەک ڤەکری ئەڤ خوەپێشاندان ژ ئالیێ پەکەکێ ڤە تێنە رێکخستن و پرانی ھەڤالبەندێن پەکەکێ د ڤان خوەپێشاندانا دا جھ دگرن.
لێ د سەری دا تەنێ ژ بۆ کەرب و کینا ل ھمبەر پەدەکێ، باسکەک د ناڤ یەنەکێ دا و ھندەک ئالیێن دی پشگریا خوەپێشاندانا کرن. لێ دەما دیتن کو دێ ئاگرێ خوەپێشاندانا یەکەمجار وان ب خوە شەوتینیت، ھێدی ھێدی خوە پاشڤە کێشا. باسکێ لاھۆر جەنگی ئاشکەرا پشگریا پەکەکێ و ڤان خوەپێشاندانا کر. لێ دەما خوەپێشاندانا کەسەکێ پلە بلندێ ئاساییشا یەنەکێ ب دار و کەڤران کوشتی، وی دەمی ھندەک عاقلمەندێن د ناڤا یەنەکێ دا مەترسییا ل بەرامبەر خوە دیتن و خواستن ب ئاوایەکی خوە ژ ڤی ئاگری خلاس بکەن. ھەتا گھایە رادەیەکێ چەکدارێن گرێدایی لاھۆر ب خوە ژی ھەولدان د ھندەک دەڤەران دا رێ ل خوەپێشاندانا بگرن. لێ دەرەنگ مان ژ بەر کو ئەوان ب خوە دەستپێکێ دا چرۆسکا توندو توژیێ گەشکربوو.
پەکەکە پشتی پەیمانا شنگالێ کو ناڤبەرا حوکومەتا کوردستانێ و ئیراقێ دا ھاتیە ئیمزاکرن، دەست ب شەرێ ل دژێ پەدەکێ کر. د مەدیا خوە دا رۆژانە بێبەختیا ل پەدەکێ دکەت و ب ھەموو ئاوایی نووچەیێن درەو بەلاڤ دکەت و ھەول ددەت پەدەکێ ب ئاوایەکێ برووخینیت. لێ د ڤێ یەکێ دا پەکەکە تەنێ خوە دخاپینیت. پەدەکێ تەجرووبەیەکا دوور و درێژ ل گەل پەکەکێ ھەیە. نھا ژی ئالیێن کو ل باشوور پشگریا پەکەکێ دکەن ب ئاوایەکی ھەول ددەن کو ژ بۆ کو خوە ژ ڤی ئاگری خلاس بکەن رێیەکێ ببینن.
پەکەکە ل باکور گھایە ئارمانجا خوە، جڤاتا کورد سەرووبن کریە و تەخریباتێن مەزن کرنە. بوونە سەدەم کو ب دەھان ھزاران جوانێن کورد ژیانا خوە ژ دەست بدەن. ب ھزاران گوند ڤال بوون، ملیۆنا ئینسانا دەست ژ ئاخ، مال و ملکێن خوە بەردان ل باژێرێن ترکیێ بوونە پەنابەر و رۆژانە دبنە ئارمانجا ئێریشێن نژادپەرەستێن ترک. ھەستێن نەتەوی نەهێلان و داکو رۆژەکێ ژ رۆژان جارەکا دی کورد نەشێن ل سەر خەتەک نەتەوی داخوازا مافێن خوەیێن رەوا بکەن ھەر تشت ھەرماندن.
ل رۆژھلاتێ کوردستانێ ل دژێ تەڤگەرا ئازادخوازا کورد ل تەنشتا حوکومەتا ئیرانێ سەکنین و بوونە ھەڤالبەندێن پاسدارێن ئیرانێ و ھێزێن خوە کرنە د بن فەرمانایێن وەک قاسمی دا.
ل رۆژئاڤایێ کوردستانێ ب پشگریا حوکومەتا ئیران، ئیراق و سوریێ وەک نێنەرێن حوکومەتا سوریێ بوونە خوەدی دەستھەلات. ل رۆژئاڤا راکرنا ئالا کوردستانێ قەدەغە کرن، ناڤێ کوردستانێ د ھیچ دەزگەھەکێ دا کار نائینن و ھەولدان ناڤێ کوردستانێ وندا بکەن. لێ پشتی سیاسەتا ئامەرکا ل دەڤەرێ نھا ھێڤیەکیا یەکرێزیا کوردێن رۆژئاڤایێ کوردستانێ دەرکەتیە ھۆلێ. پەکەکە داکو رێکێ ل ڤێ یەکرێزیێ بگریت ھەموو تشتەکێ دکەت.
ھەری داوی دخوازن دەستکەفتیێن کوردا ل باشوورێ کوردستانێ تێکبدەن. گەلەک ھەڤال ژ بۆ خوە چێکرن. ل باشوور ھێزێن خوە ل دژێ پەدەکێ و دەستکەفتیێن کوردستانێ کرنە د خزمەتا حەشدا شەعبی دا و شەرێ دەستھلاتداریا کوردستانێ کرن.
ل باشوورێ کوردستانێ پەکەکە دێ یەکەم جار سەرێ لایەنێن کو ل گەل وان ھەڤکارییێ دکەن خوەت. ئەڤە راستییا پەکەکێیە. پەکەکە یەکەمجار دبیتە دۆست(!) و ھەڤال(!) لێ دەما بەر پییێن خوە دبینیت، ھەول ددەت وان دۆست و ھەڤالان ژ ھۆلێ راکەت. دێ ل باشوورێ کوردستانێ ئەڤ چەندە چێبیت. دێ یەنەکە مەجبوور بیت یان شەرێ پەکەکێ بکەت، یانژی ستویێ خوە ل ھمبەر پەکەکێ خوار بکەت. ئەڤ یەک ژی ب تەمامی تێکچوونا یەنەکێ ل دووڤ خوە دئینیت.
پەیوەندی و خیانەتێن پەکەکێ کرین، پەدەکە پێتر ژ ھەر کەسەکێ دزانیت. ئەڤ تەجرووبە ل سەر پەدەکێ ژی دەرباس ببوو. پەکەکێ ل باشوورێ کوردستانێ ئاژاوێ دروست دکەت و چالاکیێن تەرۆرستی دکەن. پەکەکە نە تەنێ دژاتیا پەدەکێ دکەت، دژاتیا دەستکەفتیێن نەتەوی د کەسایەتا پەدەکێ دا دکەت.
پێدڤییە تشتەک باش بهێتە زانین ل گۆرا ڤێ ژی ئالیێن سیاسی ببنە خوەدی ھەلوەست. پەکەکە، کەجەکە، ھەدەپە، کەنەکە، پەھەدە،کەجەدە و ھەموو دام و دەزگەھێن د بن ناڤێن جودا دا سیاسەتا پەکەکێ رێڤە دبەن فەرمانا خوە ژ قەندیل وەردگرن و تو جوداھییا سیاسی د ناڤبەرا وان دا نینە. جوداھیێن ھەیی تەکتیکن و دڤێت ھەر کەسەک ڤێ یەکێ ب زەلالی ببینیت. حەتا ئەڤە نەهێتە کرن هیچ لایەنەک نەشێت خوە و بەرژەوەندیێن نەتەوی و دەستکەفتیێن کوردستانی ل ھمبەر ئێریشێن پەکەکێ بپارێزیت. وەکی دی خوە خاپاندنە.
بابەتەکێ دی یێ گرنگ ھەیە کو دڤێت ئالیێن سیاسی یێن کو کریارێن پەکەکێ جار ب جارا رەخنە دکەن، بلا خوەدیێ ھەلوەستەک زەلال بن. دەما بەحسا بوویەرەکی دکەن بلا گۆتنێن لێل و شێلی ب کار نەینن. ناڤێ ئالیێن کو سەدەمێن بوویەرانە ڤەکری بێژن. بلا ل ھمبەر پەکەکێ خوەدیێ سیاسەتەک زەلال بن. پەکەکە نە کوردستانیە و نە تەڤگەرەک کوردە. ب ناڤێ کوردایاتیێ دژمناتیا ھەموو نرخێن کوردا و کوردستانێ دکە. ت
١١.١٢.٢٠٢٠
نووچە/ئانالیز
ن.فرات
