باله‌فرێن جه‌نگ یێن ده‌وله‌تا تركیێ ئیرۆ لڤ و ته‌ڤگه‌رێن چه‌كدارێن په‌كه‌كێ ل باشوورێ كوردستانێ هه‌ده‌ف كرن و چه‌ندین مووشه‌ك ل بارەگەهێن پەکەکێ یێن ل چیایێ گاره و شێلادزێ خستن.
چاڤكانیێن پێگه‌ها داركا مازی ل باشوورێ كوردستانێ ئا‌شكه‌را كر، ئیرۆ رۆژا شه‌مبی 12/12/2020ێ، باله‌فرێن جه‌نگ یێن ده‌وله‌تا تركیێ ل هه‌ر یێك ژ چیایێن گاره و سنۆرێ ناڤچه‌یا شێلادزێ یێن گرێدای پارێزگه‌ها دهۆكێ، بارەگەهێن چه‌كدارێن پارتییا كاركه‌رێن كوردستانێ هه‌ده‌ف كرن.
ئێریشا یه‌كه‌م ل دەمژمێر 11:00 به‌ری نیڤرۆ چێبوویه، باله‌فران پێگەهێن په‌كه‌كێ ل هنداڤی جیهه‌كێ كو دبێژنێ شكه‌فتێن چیچكا كو دكه‌ڤیته چیایێ گاره ل هنداڤا گه‌لیێ ئاڤۆكێ یێ باكورێ ناڤچه‌یا چه‌مانكێ بۆردۆمان كرنه و یێك مووشه‌ك ل وی ده‌رێ خستنه.
هه‌م ده‌م ئێریشا دوویه‌مین ل دەمژمێر 11:18 خوله‌ك به‌ری نیڤرۆ پێكهاتییه، وه‌ختا كو باله‌فران پێگەهێن په‌كه‌كێ ل ده‌ڤه‌را سه‌رێ سیلێ ل چیایێ كوره‌ژاری كو دبیتە ئاقارێ گوندێ بێسه‌پێ یێ ناڤچه‌یا شێلادزێ هه‌ده‌ف كرن و یە‌ك مووشه‌ك ل وێ ده‌رێ ژی خستنه.
هه‌ر چه‌ند كو زییانێن ڤێ بۆردۆمانێ حەتا نها نه‌هاتنه زانین، لێ به‌لێ چه‌كدارێن په‌كه‌كێ ب مه‌به‌ست ئێدی حه‌ره‌كه‌تا خوه خستنه نێزی گوند و باژارۆكان ژ بۆ كو ئه‌و ده‌ر ببن مه‌یدانا شه‌ری و بكه‌ڤنە به‌ر ئێریشێن باله‌فران.
