د ئێریشا ئیرۆ یا باله‌فرێن جه‌نگ یێن ده‌وله‌تا تركیێ ده، 6 چه‌كدارێن په‌كه‌كێ هاتنه هه‌ده‌ف كرن و جانێ خوه ژ ده‌ست دانه.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، ئیرۆ رۆژا شه‌می 12/12/2020ان، باله‌فرێن جه‌نگ یێن ده‌وله‌تا تركیێ ل هه‌ر یێك ژ چیایێ گاره و سینۆرێ ناڤچه‌یا شێلادزێ یێن گرێدای پارێزگه‌هییا دهۆكێ، نوقته‌یێن چه‌كدارێن پارتییا كاركه‌رێن كوردستانێ هه‌ده‌ف كر.
ئێریشا یه‌كه‌م ل ساعه‌ت 11:00 به‌ری نیڤرۆژێ چێبوویه، باله‌فران نوقته‌یێن په‌كه‌كێ ل هنداڤی جیه‌كێ كو ژێره دبێژه شكه‌فتێن چیچكا كو دكه‌ڤه چیایێ گاره ل هنداڤا گه‌لیێ ئاڤۆكێ یێ باكورێ ناڤچه‌یا چه‌مانكێ بۆردۆمان كرنه و یێك مووشه‌ك ل وی ده‌رێ خستنه.
هات راگهاندن كو د ئێریشا چیایێ گاره دا، 5 چه‌كدارێن په‌كه‌كێ كه‌تنه به‌ر مووشه‌كا باله‌فران و جانێ خوه ژ ده‌ست دانه، پارتییا كاركه‌رێن كوردستانێ تو ئاگاهی ل ده‌ربارا ئێریشێ و هه‌ده‌ف كرنا چه‌كدارێن خوه نه‌دانه.
