په‌كه‌كێ به‌رێ تۆپهاڤێژێن تركیێ دانه‌ گوندێ كێسته‌

تۆپخانه‌یێن ئارته‌شا تركیێ ئیرۆ سپێدێ سێ جاران ل دووڤ ئێك حه‌ره‌كه‌تا چه‌كدارێن په‌كه‌كێ ل گوندێ کێستە یێ گرێدای ناڤچه‌یا كانی ماسێ تۆپباران كر.

چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره‌ كر، ئیرۆ رۆژا ئێكشه‌مبیێ 13/12/2020ێ، تۆپخانه‌یێن ئارته‌شا تركیێ، سێ جاران ل په‌ی هه‌ڤ، لڤ و ته‌ڤگه‌رێن چه‌كدارێن پارتییا كاركه‌رێن كوردستانێ، ل گوندێ كێسته‌ یێ گرێدای سینۆرێ ناڤچه‌یا كانی ماسێ تۆپباران كرن.

ده‌ست نیشان كر، ئه‌ڤ ئێریش پاش ده‌مژمێر 7 سه‌رێ سبێ پێكهاتییه‌، وه‌ختا كو حه‌ره‌كه‌تا چه‌كدارێن په‌كه‌كێ نێزی گوند بووین.

دەربارێ زیانان چاڤكانیێن مه‌ ئه‌شكه‌ره‌ كر، ژ خەلکێ سڤیل چ زیانه‌كا جانی نەبوویە، لێ بوویە سەدما ترسێ ل جه‌م وه‌لاتیێن ده‌ڤه‌رێ.

د 24 ده‌مژمێرێن رابووری دا و ب سه‌ده‌ما په‌كه‌كێ، تركیێ هه‌ر یێك ژ چیایێ گاره‌، ناڤچه‌یێن شێلادز و دێره‌لۆكێ بۆردۆمان كرنه‌، د ئێریشا گاره‌ی دا‌ 5 گه‌ریلا كوشتن.

په‌كه‌كه‌ چه‌ند پاشتره‌ پێتر حه‌ره‌كه‌تا چه‌كدارێن خوه‌ دئێخیته‌ ناڤا گوند و دۆربه‌را باژارۆكان، ئه‌ڤ یێك ژی سیاسه‌تا رێخستنێ  یه‌ ژبۆ كو ئه‌ڤ ناڤچه‌ ببن مه‌یدانا شه‌ر و ژ خه‌لكی بهێنه‌ ڤالا كرن.

ژ ده‌ستپێكا ئێریشا مه‌ها خزیرانا ئیسالێ ڤه‌، ب سه‌ده‌ما ڤێ سیاسه‌تا په‌كه‌كێ، پێتری 50 گوندان ل باشوورێ كوردستانێ ڤالا مانه‌.