سەرۆکێ سەرھلدانا یەکەما بارزان یا ل دژی دەولەتا عۆسمانیان شێخ عەبدولسەلام بارزانی، پشتی کو ب هاریکاریا ئینگلیزان دهێتە دیلگرتن 14ێ کانوونا 1914ێ ب بریارەکا ب لەز یا دادگەھەکا ل مووسلێ ل بەر چاڤێ برایێ وی مەلا مستەفا بارزانی ھاتە دارڤەکرن.
شێخ عەبدولسەلامێ کورێ شێخ ئەحمەدێ بارزانی سالا 1887ێ وەک ئەندامەکێ مالباتا شێخێن بارزان ھاتیە سەر دنیایێ.
شێخ عەبدولسەلام، د سەرھلدانا یەکەم یا بارزان ل سالا 1908ێ دا سەرۆکاتی کریە و گەلەک جاران زۆرا ھێزێن عۆسمانیان بریە، لێ عۆسمانیان ب هاریکاریا ئینگلیزان تەڤگەرا شێخ عەبدولسەلام دایە راوەستاندن و پشترا ژی ھاتیە دیلگرتن.
شێخ عەبدولسەلام ژ بەر کو بابێ وی ژ لایێ دەولەتا عۆسمانی ڤە هاتە نەفی کرن ژ بۆ بەدلیسێ، پرانیا زارۆکاتیا خوە ل بەدلیسێ دەرباس کریە. پشترا ل گەل مالباتا خوە ڤەگەریایە بارزانێ. پشتی وەفاتا بابێ خوە سەرۆکاتیا عەشیرا بارزان کریە. عەشیرا بارزان د بن سەرۆکاتیا وی دا پێشکەفتنێن بەرچاڤ بدەست خستینە. ھەموو لایەنێن عەشیرێ ب ھەڤ ڤو گرێدایە و ئەو کرنە یەک.
دەما سەرۆکاتیا خوەیا کورد دا ل گەل گەلەک عەشیرێن کوردان تێکلیێن خورت دروست کرن. د رێیا رزگاری و خەلاسکرنا وەلاتێ کوردان و ئاخا وان ژ بن زلمێ و داگرکەریێ خەبات کریە.
ل گەل رێخستنێن وەکی جەمعیەتا کورد تەعالی و تەرەقی، ھێڤی و جەمعیەتا سەرکەفتنا کوردستانێ پەیوەندی دروست کرینە. ل گەل شێخ مەحموودێ بەرزەنجی، شێخ عەبدولقادرێ نەھری، ئیسماعیل ئاغایێ شکاک ل سەر مەسەلا کوردان ھەڤدیتن پێک ئانینە.
شێخ عەبدولسەلام بارزانی، د بھارا سالا 1907ێ دا ل گەل سەرۆکێن عەشیرێن کوردان تەلەگرافەک کو داخوازێن کوردان تێدا هاتبوون نڤیساندن ژ بۆ دەستھەلاتداریا باب-ێ عالی عۆسمانی شاندن و ئەڤ داخواز رێز کرنە:
پێدڤیە زمانێ کوردی ببیتە زمانێ فەرمی
ل کوردستانێ پەروەردە ب زمانێ کوردی بیت
پێدڤیە کارمەندێن ل کوردستانێ کوردی بزانن.
دادگەھ ل گۆری شەرعیەتێ بریاران بدەن.
پێدڤیە باجێن کو ژ ھەرێمێ تێنە ستاندن ل ھەرێمێ بێتە خەرجکرن.
شێخ عەبدولسەلام، پشتی کو دهێتە دیلگرتن 14ێ کانوونا سالا 1914ێ ل مووسلێ ب بریارەکا ب لەز یا دادگەھا مووسلێ ھاتە دارڤەکرن. وی دەمی پارێزگارێ مووسلێ سولەیمان نەزیف بوو کو بخوە ژی کورد بوو، لێ بریارا دارڤەکرنا شێخ عەبدولسەلام بلەز بجھ ئانی.
