بەرپرسەکی یەنەکێ دبێژیت، ئێدی لازمە یەنەکە رەفتارێن خوە ل گەل پەکەکێ بگوھریت. ئەو ل سەر شەھیدکرنا پێشمەرگەیەکی ل پێنجوێنێ ژی، گومانێ تێختە سەر پەکەکێ/پەژاکێ.
بەرپرسێ پێشمەرگەیێن دێرین یێن یەنەکێ ل دەڤەرا شارباژێر یا سلێمانیێ و فەرماندەیێ سەربازی یێ یەنەکێ، ھێرش مەلا خدر راگەهاند، دەستەکێ رەش ل پشت خوەپێشاندان و ئالۆزیێن چەند رۆژێن بۆری یێن پارێزگەھا سلێمانیێ یە.
ھێرش مەلا خدر ھەر وەھا گۆت، ئەوێن کو بارگەھێن پارتیان و ئاڤاھیێن حکوومەتێ سۆتی، خەلکێ باژارێ سلێمانیێ نەبوون، ژ بەر کو باژارێ سلێمانیێ باژارێ مرۆڤێن رەوشەنبیر و قەھرەمانە و خەلکێ ڤی باژێری چ جاران باژارێ خوە وێران ناکەن.
وی فەرماندەیێ سەربازییێ یەنەکێ بەحسا رۆلا پەکەکێ ژی د خوەپێشاندانان دا کر و گۆت، دەمەک درێژە پەکەکە ل پارێزگەھا سلێمانیێ ئەکتیڤە. باژارێ سلێمانیێ مێڤاندۆستە و ھەر دەم دەریێ خوە ل بەر مێڤانان ڤەکریە. لێ پەکەکە پیڤانێن مێڤانداریێ بن پێ دکەت و نانی دخوەت و سفرەیا مە ژی ددڕینیت.
وی بەرپرسێ یەنەکێ ئانی زمان، ئێدی دەما وێ ھاتیە یەنەکە رەفتارێن خوە ل ھەمبەر پەکەکێ بگوھریت. لازمە پەکەکە خەباتێن خوە دەرباسی باکوورێ کوردستانێ و ترکیێ بکەت. پەکەکە بەھانەیان ددەتە دەستێ ترکیێ دا کو ئێرشی ھەرێما کوردستانێ بکەت. ئەز فام ناکەم پەکەکە بۆچی دهێت ل ڤێرە گومرکێ وەردگریت؟! هندی کو ئەز دزانم پارەیێ وان گەلەکە.
ل سەر شەھیدکرنا پێشمەرگەیەکێ حکوومەتا هەرێمێ ل باژارۆکێ پێنجوێنێ ژی، وی بەرپرسێ یەنەکێ گۆت، ئەو پێشمەرگە ب قەناسێ ھاتیە شەھیدکرن. خوەپێشاندەر نەشێن وی چەکی بکار بینن. لێ ل وێ دەڤەرێ چەکدارێن پەکەکێ و پژاکێ ھەنە ژ بەر وێ ژی گومانا مرۆڤی دچیتە سەر وان.
