دربه‌كێ مه‌زن ب ژێده‌رێ دارایی یێ په‌كه‌كێ كه‌ت
مه‌زنترین ئۆپه‌راسیۆنا ده‌رباس كرنا مادده‌یێن هشبه‌رێ یا رێخستنا په‌كه‌كێ، ل باكورێ كوردستانێ راستی شكه‌ستنێ هات و ئه‌ڤ دبیته دربه‌كێ مه‌زن ژ بۆ ژێده‌را سه‌ره‌كی یا داراییا ڤێ رێخستنێ.
ده‌وله‌تا تركیێ، دربه‌كێ مه‌زن ل ژێده‌رێ دارایی یێ رێخستنا په‌كه‌كێ دا وه‌ختێ كو دوهـی رۆژا دوشه‌مبیێ 14/12/2020ێ، پتری یه‌ك تۆن مادده‌یێن هشبه‌رێ ژ جۆرێ حه‌شیش یێن ڤێ رێخستنێ ل لجێ یا ئامه‌دێ ده‌سته‌سه‌ر كری.
ل گۆری داخویانییا وه‌زاره‌تا ناڤخوه یا تركیێ، هێزێن دژه ته‌رۆرێ قاسی یه‌ك تۆن و 16 كیلۆگرام مادده‌یا حه‌شیشێ ل گونده‌وارێ لجێ د دوو ڤه‌شارگه‌هان دا ده‌سته‌سه‌ر كرینه.
ل گۆری یه‌كێتییا ئه‌ورۆپایێ و پۆلێسێن ناڤده‌وله‌تی ئێنته‌رپۆلێ، بازرگانییا مادده‌یێن هشبه‌رێ ژێده‌رێ سه‌ره‌كی یێ دارایی یێ رێخستنا په‌كه‌كێ یه.
د ڤێ ده‌ربارێ دا ل داوییا سالا رابووری، یه‌كێتیا ئه‌ورۆپایێ په‌كه‌كه ب بازرگانییا مادده‌یێن هشبه‌رێ سووچبار كربوو و راگه‌هاندبوو، ژ 2012 هه‌تا 2019ێ، ڤێ رێخستنێ ملیارێن دۆلاران ژ ڤێ بازرگانیێ ب ده‌ست ئێخستینه.
ناڤه‌ندا ئه‌ورۆپی یا ل دووڤچوونا مه‌له‌فا مادده‌یێن هشبه‌ر و هیبوونا هشبه‌رێ كو ب «EMCDDA» تێ ناس كرن، راپۆره‌كا هه‌ڤپار یا سالا 2019ێ وه‌شاند كو ل گه‌ل سازییا پۆلیسێن ئه‌ورۆپایێ یۆرۆپۆلێ ئاماده‌كرییه و تێدا، رێخستنا په‌كه‌كێ ب بازرگانییا هه‌ری به‌رفرهـ یا مادده‌یێن هشبه‌رێ ل ئه‌ورۆپایێ سووچبار كرییه.
د راپۆرێ دا هاتییه: رێخستنا په‌كه‌كێ كو ژ سالا 2002 د كاته‌گورییا یه‌كێتییا ئه‌ورۆپایێ یا ته‌رۆرێ دا بوو، ده‌سته‌كێ هه‌ری به‌رز د بازرگانییا مادده‌یێن هشبه‌رێ ل ئه‌ورۆپایێ دا هه‌یه و ب رێیا بازرگانییا نه‌مه‌شرۆع یا ڤێ رێخستنێ، بازارێ مادده‌یێ هشبه‌رێ ل ئه‌ورۆپایێ زێده كارایه.
هه‌موه‌ختا ئه‌ڤێ راپۆرێ، رێخستنا پۆلیسێن ئه‌ورۆپایێ یۆرۆپۆلێ د راپۆرێن خوه یێن به‌رێ دا، ته‌سبیت كر كو داهاتێ سالانه یێ په‌كه‌كێ ژ بازرگانییا مادده‌یێن هشبه‌رێ دگه‌هیته نێزی 3 ملیار دۆلاران.
یۆرۆپۆل دبێژیت: په‌كه‌كه نه ته‌نێ ب بازرگانییا هشبه‌رێ سووچباره، لێ به‌لێ ئه‌وێ ده‌ست د راكێشانا زارۆیان د جیهانا مادده‌یێن هشبه‌رێ دا هه‌یه.
