کۆنسولخانەیا گشتی یا ئەمرریکایێ یا ل ھەولێرێ سەرساخی دا مالباتا شەھیدێ پێشمەرگە عەبدورەحمان ئەمین، کو ژ بەر ئێریشا چەکدارێن پەکەکێ، ل دەڤەرا ئامێدیێ شەھید بوو.
کۆنسولخانەیا ئامەریکایێ ل سەر حەسابا خوە یا تویتەرێ راگەھاند: “ئەم سەرساخییێ ئاراستەیی مالباتا مولازمێ یەکەم عەبدورەحمان ئەمین دکەین کو د رووبرووبوونەکێ دا ل گەل چەکدارێن پەکەکێ ل نێزیکی ئامێدیێ یا سەر ب پارێزگەھا دوھۆکێ ڤە ژیانا خوە ژ دەست دا.”
پێشمەرگە عەبدورەحمان ئەمین شەڤا 13ێ کانوونا 2020ێ، ژ بەر ئێریشەکا ب خیانەت یا چەکدارێن پەکەکێ، ل سەر رێکا گوندێ دێرەشییێ نێزی گوندێ سگێرێ، سەر ب ناڤچەیا ئامێدیێ یا ل پارێزگەھا دوھۆکێ شەھید بوو.
ئێریش و تەڤگەرێن چەکدارێن پارتیا کارکەرێن کوردستانێ (پەکەکێ) ل ناڤ ئاخا ھەرێما کوردستانێ، بوویە سەدەما نیگەرانیا کۆنسولخانە و نوونەرێن وەلاتان، بەری نھا ژی کۆنسولێ گشتی یێ بریتانیایێ ل ھەولێرێ تەڤی پەیاما سەرساخیێ ل مالباتا وی شەھیدی، پەکەکە وەکو رێخستنەکا تیرۆریست ب ناڤ کر و راگەھاند؛ دڤێت چەکدارێن ڤێ رێخستنێ ژ ئاخا ھەرێما کوردستانێ دەرکەڤن.
