سەرۆک وەزیرێ حکوومەتا ھەرێما کوردستانێ مەسروور بارزانی، ئێریشا YPG یا شەڤا بۆری ل سەر ھێزێن پێشمەرگە ب توندی شەرمەزار کر و ژ ھەڤپەیمانیا ناڤدەولەتی خواست، وان پشتراست بکەن جارەکا دی یەپەگە “دەستدرێژیێ ل سەر ھەرێما کوردستانێ” نەکەت.
سەرۆکوەزیر بارزانی دەربارێ ئێریشا شەڤا بۆری یا YPG ل سەر خالەکا ھێزێن پێشمەرگە، ل دەڤەرا سحێلایێ داخویانیەک بەلاڤ کر.
مەسوور بارزانی ئێریشا YPG ب توندی شەرمەزار کر و راگەھاند، ھەگەر ئێریشێن ب ڤی رەنگی دوبارە ببن دێ زیانەکا مەزن گەهیتە ھەرێمێ.
د داخویانیا نڤیسکی دا، سەرۆک وەزیر بارزانی دبێژیت، شەڤا بۆری کۆمەکا چەکدار خواستیە ب رەنگەکێ نەیاسایی دەرباسی ناڤ سینۆرێن ھەرێما کوردستانێ ببن و ئەڤ یەک ل دژی یاسایان و قانوونا ئەولەکاریا سینۆرانە، ژ بەر وێ ژی ھاتنە ئاستەنگکرن.
سەرۆکوەزیر بارزانی دیار کر کو YPGێ پشترا ب چەکێن گران ئێریشی بارەگەهێ پێشمەرگا کریە و بەرسڤا وان ھاتیە دایین و ھاتنە دوورخستن ژ دەڤەرێ.
مەسروور بارزانی گۆت: “ئەڤ ئێریشا کو ب ئاوایەکی ئاشکەرا بنپێکرنا خاک و سەروەریا ھەرێما کوردستانێ بوو ب توندی شەرمەزار دکەم.”
بارزانی ھەروھا بانگ ل ھەڤپەیمانیا ناڤدەولەتی ژی کر و راگەھاند:
“دڤێت ھەڤپەیمانیا ناڤدەولەتی یا دۆست و ھەڤپەیمانا مە، گارانتیێ بدەتە مە کو یەپەگە جارەکا دی ئێریشێن ب ڤی رەنگی نەکەت. دیسا دڤێت دەستوور نەهێتە دان کو هاریکاریێن وەلاتێن ھەڤپەیمانیێ د ئێریشێن دژی ھەرێما کوردستانێ دا بهێنە بکارئانین. بێگومان دوبارەکرنا ڤان جورە ئێریشان دێ زیانەکا مەزن گەهینیتە ھەرێمێ. ئەز ستاییشا پێشمەرگەیێن قەھرەمان دکەم کو ژ بۆ سلامەتی و پاراستنا مە ھەر رۆژ ژیانا خوە دکەنە خەتەرێ دا.”
