ئه‌ڤ سێ رۆژن ب ئاوایه‌كی سیسته‌ماتیك باره‌گه‌هێن پارتیێن كوردستانی ل رۆژئاڤا وه‌لات، ژ پال رێخستنێن په‌كه‌كێ ڤه دهێنه سۆتن، بوویه‌ر ل به‌ر چاڤێن رێڤه‌به‌رییا خوه‌سه‌ر دهێنه ئه‌نجام دان.
چاڤكانیێن پێگه‌ها داركا مازی ل رۆژئاڤا كوردستانێ ئه‌شكه‌ره كر، دوهی مه‌غره‌ب 16/12/2020ێ، باره‌گه‌ها پارتییا ده‌مۆكرات یا كوردستانێ – سووریێ، ل باژارێ قامشلۆ راستی ئێریشه‌كێ ژ پال هنده‌ك چه‌كدارێن نه‌ناس كری ڤه هات، هه‌ولا سۆتنێ هاته دان.
ده‌ست نیشان كر، وان چه‌كداران كو ژ رێخستنێن «جوانێن شۆره‌شگه‌ر» یێن گرێدای په‌كه‌كێ نه، خوه‌ست باره‌گه‌ها په‌ده‌كه‌سێ بسوژن و هنده‌ك مۆلۆتۆف هاڤێتنه د باره‌گه‌هێ ڤه، لێ به‌لێ چ زیانه‌ك پێ نه‌كه‌تییه و ئه‌ڤ هه‌ول وان شكه‌ستن ئینا.
پاش ڤێ بوویه‌رێ هێزێن ئاساییشا رۆژئاڤا گه‌هشتنه جهێ بوویه‌رێ و باره‌گه‌ها په‌ده‌كه‌سێ ژ پال وان ڤه هات دۆرپێچ كرن.
تێ زانین ل مه‌ها ته‌باخا ئیسالێ، باره‌گه‌ها په‌ده‌كه‌سێ ل قامشلۆ ژ پال رێخستنێن «جوانێن شۆره‌شگه‌ر» ڤه هاتبوو سۆتن و سلۆگانێن په‌كه‌كێ ل سه‌ر دیوارێن باره‌گه‌هێ نڤیساندبوون، ل وێ ده‌مێ پێگه‌ها مه ئه‌شكه‌ره كر بوو كو ئه‌ڤ بوویه‌ر راسته راست ب فه‌رمانا جه‌میل باییك دهێنه ئه‌نجام دان، ب ئارمانجا خراب كرنا دانوستاندنێن رۆژئاڤا كوردستانێ كو ل نێڤبه‌را په‌یه‌دێ و ئه‌نه‌كه‌سێ ده‌ست پێ كرینه.
ئه‌ڤ ده‌ما سێ رۆژانه بوویه‌رێن نه‌خوه‌ش ل رۆژئاڤا كوردستانێ چێدبن، باره‌گه‌هێن پارتیێن كوردستانی دهێنه سۆتن، سیاسه‌تڤان دهێنه ته‌هدید كرن، هه‌ر یێك ژ باره‌گه‌هێن ئه‌نه‌كه‌سێ ل عاموودێ و دربێسیێ، باره‌گه‌ها پارتییا ئه‌لوه‌حده ل حه‌سه‌كێ و قامشلۆ هاتنه سۆتن، رێڤه‌به‌رییا خوه‌سه‌ر ژی هه‌تا نها چ لێكۆلینێن جددی د ڤێ ده‌ربارێ ده ده‌ست پێ نه‌كرینه.
