ل دیاربەکرێ ژ لایای حەرەکەتا ئازادی و جوانێن نەتەوەیی یێن کوردستانێ ڤە جڤینەکا چاپەمەنیێ ھاتە ل دارخستن کو ھەم رۆژا ئالایێ کوردستانێ ھاتە پیرۆزکرن، ھەم ژی ئێریشێن کو ھەمبەر باشوورێ کوردستانێ تێنە کرن ژی ھاتنە شەرمەزارکرن.
حەرەکەتا ئازادی و جوانێن نەتەوەیی یێن کوردستانێ ل دیاربەکرێ دەربارێ مژارێن سەرەکی یێن کوردستانێ دا جڤینەکا چاپەمەنیێ ل دار خست.
د جڤینێ دا 17ێ کانوونێ رۆژا ئالایێ کوردستانێ ھاتە پیرۆزکرن و دەربارێ ئێریشێن پەکەکێ و یەپگێ دا ھاتە ئاماژەکرن کو ناهێتە قەبوولکرن ئاخا ب کەدا کوردان ھاتیە ئازادکرن راستی ئێریشێن کو خزمەتا خێرنەخوازێن کوردستانێ دکەت بێت.
سەکرەتەرێ حەرەکەتا ئازادی مەتین پیرانی ژ بۆ K24ێ راگەهاند، هەر دەما ل کو دەرا جیھانێ بیت بلا ببیت کورد کەتنە تەنگاسیێ دا ژ باشوورێ کوردستانێ دەستێ هاریکاریێ درێژ بوویە و تشتێ دهێتە کرن زیانەکا مەزن ددەتە ھەموو کوردان.
مەتین پیرانی راگەھاند: “یەپەگە دبێژیت ئەو پاراستنا خاکا سووری دکرن و دبێژن ئەو پارتیەکا سوریایی نە و رادبن ئێریشی خاکا کوردستانێ دکەن. بلا کۆبانیێ بیننە بیرا خوە. دەما کو کەتبوون تەنگاسیێ پێشمەرگە چوو هاریکاریا وان و ب ھەڤ را کۆبانێ رزگار کرن.”
د جڤینا چاپەمەنیێ یا حەرەکەتا ئازادی دا چاڤدێرێن سیاسی ژی بەشدار بوون و بال کێشا سەر رۆژا ئالایێ کوردستانێ و ئێریشێن پەکەکێ و یەپەگێ یێن سەر باشوورێ کوردستانێ و پێشمەرگەیان.
چاڤدێرێ سیاسی مەھمەت ئەکینجی ئانی زمێن کو واتادارە رۆژەکێ بەریا رۆژا ئالایێ کوردستانێ ئێریشی نرخێن نەتەوەیی یێن کوردان بێتە کرن کو ئەڤ چەندە نیشان ددەت د پشت ئێریشان دا کیژان ھێز ھەیە.
مەھمەت ئەکینجی دیار کر: “ئەز رۆژا ئالایێ کوردستانێ ل ھەموو کوردان پیرۆز دکەم. ھێڤی دکەم گەلێ کورد ل بن وێ ئالایی دا سەرکەفتی بیت. پەکەکە دیرۆکا کوردان ئینکار دکەت، سەرۆکێن کوردان ئینکار دکەت و ئالایێ کوردستانێ ئینکار دکەت. ژ بلی خوە هیچ کەسەک دی ناس ناکەت.”
گەنجێن کو تەڤلی جڤینا چاپەمەنیێ بوون ژی ئاماژە کرن کو نرخێن نەتەوەیی یێن کوردستانێ نە نرخێن لایەنەکێ و پارتیەکێ تەنێ نە و دەما ئێریش ل نرخێن نەتەوەیی یێن وەک پێشمەرگە، ئاخ و ئالایێ کوردستانێ دهێتە کرن کێ کربیت بلا بکەت ئەڤ یەک ب واتەیا ئێریشکرنە سەر ھەمو کوردان دهێت.
